Peddi Mega Blockbuster Event Highlights

మెగా పవర్ స్టార్ రామ్ చరణ్ కథానాయకుడిగా, బుచ్చిబాబు సానా దర్శకత్వంలో తెరకెక్కిన ‘పెద్ది’ చిత్రం బాక్సాఫీస్ వద్ద సంచలన విజయాన్ని నమోదు చేసింది. విడుదలైన తొలి రోజు నుంచే ప్రేక్షకులు, విమర్శకుల ప్రశంసలు అందుకున్న ఈ చిత్రం రికార్డు స్థాయి కలెక్షన్లతో 2026లో సౌత్ ఇండియా నంబర్ వన్ గ్రాసర్‌గా నిలిచింది. ఈ ఘన విజయాన్ని పురస్కరించుకుని చిత్రబృందం నిర్వహించిన ‘పెద్ది మెగా బ్లాక్‌బస్టర్ ఈవెంట్’ అత్యంత వైభవంగా జరిగింది. ఈ వేడుకకు మెగాస్టార్ చిరంజీవి ముఖ్య అతిథిగా హాజరై చిత్రబృందంపై ప్రశంసల వర్షం కురిపిస్తూ చరణ్‌ గురించి ఎమోషన్ స్పీచ్ ఇచ్చారు.

చిరంజీవి తన ప్రసంగంలో సినిమా తనను పూర్తిగా మరో ప్రపంచంలోకి తీసుకెళ్లిందని చెప్పారు. సినిమా చూస్తున్నంతసేపూ రామ్ చరణ్ కనిపించలేదని, ‘పెద్ది’ అనే పాత్ర మాత్రమే కనిపించిందని అన్నారు. ఒక నటుడిగా చరణ్ యాక్షన్, డ్యాన్స్, ఎమోషన్స్, ఇంటెన్సిటీ, పాత్రలో లీనమయ్యే తీరులో అత్యున్నత స్థాయికి చేరుకున్నాడని అభినందించారు.
‘రంగస్థలం’ తర్వాత అంతటి బలమైన పాత్ర చరణ్‌కు మళ్లీ రావడానికి చాలా కాలం పడుతుందని అనుకున్నానని, కానీ ‘పెద్ది’ రూపంలో మరో అద్భుతమైన పాత్ర దక్కడం తనకే ఆశ్చర్యంగా అనిపించిందన్నారు. ఈ పాత్రలో చరణ్ నవ్వించాడని, ఏడిపించాడని, భావోద్వేగానికి గురి చేశాడని, చివరికి ప్రేక్షకుల హృదయాలను గెలిచాడని పేర్కొన్నారు.

Peddi Mega Blockbuster Event Highlights

‘న్యూ ఏజ్ మెగాస్టార్’ అనే టైటిల్ ఎంతో ఆనందం ఇచ్చింది
ఇటీవల ప్రధానమంత్రి నరేంద్ర మోదీ సమక్షంలో రామ్ చరణ్‌కు ‘న్యూ ఏజ్ మెగాస్టార్’ అనే గుర్తింపు రావడం తనకు తండ్రిగా ఎంతో గర్వాన్ని కలిగించిందని చిరంజీవి తెలిపారు. ఒక తండ్రికి తన కొడుకు ఎదుగుదల చూసే ఆనందాన్ని మాటల్లో చెప్పలేమని, ఈరోజు తాను ఆ పుత్రోత్సాహాన్ని నూటికి నూరు శాతం అనుభవిస్తున్నానని భావోద్వేగంగా చెప్పారు.

చరణ్ కష్టంపై చిరంజీవి ఎమోషనల్
సినిమా కోసం చరణ్ చేసిన బాడీ ట్రాన్స్‌ఫర్మేషన్‌, ప్రతిరోజూ చేసిన కఠినమైన వ్యాయామాలు, షూటింగ్ సమయంలో కంటికి తీవ్ర గాయం అయినప్పటికీ వెనక్కి తగ్గకుండా పని పూర్తి చేసిన తీరును చిరంజీవి గుర్తుచేసుకున్నారు. ఎనిమిది కుట్లు పడినా తన అంకితభావాన్ని తగ్గించలేదని, అలాంటి కష్టాన్ని చూసినప్పుడు తండ్రిగా గర్వంతో పాటు ఆందోళన కూడా కలిగిందని చెప్పారు.

‘పెద్ది’ నా జీవితాన్నే మార్చేసింది – రామ్ చరణ్
రామ్ చరణ్ మాట్లాడుతూ, ఈ సినిమా విజయం తన జీవితంలో ఎప్పటికీ మరచిపోలేని అనుభూతిని ఇచ్చిందన్నారు. సాధారణంగా విజయాలు ఆనందాన్ని ఇస్తాయని, కానీ ‘పెద్ది’ విజయం మాత్రం తన జీవితాన్నే మార్చేసిందని చెప్పారు. అత్యంత ఆసక్తికరమైన విషయాన్ని పంచుకుంటూ… సినిమా విడుదలకు ముందు తన కుమార్తె క్లీంకార తనను “నాన్న” అని పిలిచేదని, సినిమా విడుదలైన తర్వాత మాత్రం “పెద్ది” అని పిలవడం ప్రారంభించిందని చెప్పారు. ఇప్పుడు ఇంట్లోనే కాదు, బయట కూడా అందరికీ “పెద్ది” అనే పేరే గుర్తుండిపోతుందని అన్నారు.

ప్రేక్షకుల ప్రేమే అసలైన అవార్డు
సోషల్ మీడియాలో చిన్నపిల్లలు “మస్సా మస్సా” పాటకు డ్యాన్స్ చేస్తుండటం చూసి ఎంతో ఆనందం కలిగిందని చరణ్ చెప్పారు. కుటుంబ సమేతంగా ప్రేక్షకులు థియేటర్లకు రావడం ఈ సినిమాకు లభించిన గొప్ప గౌరవమన్నారు. తెలుగువారు ఒకసారి ప్రేమిస్తే జీవితాంతం ఆ అభిమానాన్ని కొనసాగిస్తారని, అదే ప్రేమను ‘పెద్ది’పై చూపించారని ప్రేక్షకులకు ప్రత్యేక కృతజ్ఞతలు తెలిపారు.

Peddi Mega Blockbuster Event Highlights

సుకుమార్ ఆసక్తికర వ్యాఖ్యలు
సుకుమార్ మాట్లాడుతూ, బుచ్చిబాబు ఈ కథ చెప్పినప్పుడే తాను, రామ్ చరణ్ ఇద్దరూ ఆశ్చర్యపోయామని తెలిపారు. కమర్షియల్ హీరో అయిన చరణ్ ఇలాంటి కాన్సెప్ట్ సినిమాను నమ్మి చేయడం గొప్ప విషయమని, ఆ నమ్మకాన్ని ప్రేక్షకులు బ్లాక్‌బస్టర్ విజయంగా మార్చారని అన్నారు.
అంతేకాకుండా, “RC17 ఎలా ఉంటుందో మీ ఊహకే వదిలేస్తున్నా” అంటూ అభిమానుల్లో ఆసక్తిని పెంచారు.

బుచ్చిబాబు భావోద్వేగం
దర్శకుడు బుచ్చిబాబు మాట్లాడుతూ, చిన్నప్పుడు చిరంజీవికి లేఖలు రాసేవాడినని, ఆయన నుంచి సమాధానం రాకపోయినా తన తొలి కథ చెప్పే అవకాశం మాత్రం చిరంజీవికే దక్కిందన్నారు. ‘పెద్ది’ పాత్రను ప్రేక్షకుల హృదయాల్లో శాశ్వతంగా నిలబెట్టింది రామ్ చరణ్ నటనేనని పేర్కొన్నారు. తాను ఊహించిన దానికంటే పదిరెట్లు గొప్పగా చరణ్ ఆ పాత్రను ఆవిష్కరించారని ప్రశంసించారు.

నిర్మాత సతీష్ కిలారు సంతోషం
నిర్మాత వెంకట సతీష్ కిలారు మాట్లాడుతూ, విడుదలై మూడు వారాలు దాటినా థియేటర్లలో సినిమా విజయవంతంగా ప్రదర్శితమవుతోందని చెప్పారు. ముఖ్యంగా సింగిల్ స్క్రీన్స్‌, బీ-సీ సెంటర్లలో ప్రేక్షకుల ఆదరణ అద్భుతంగా ఉందన్నారు. రెండేళ్ల పాటు మొత్తం టీమ్ ఎంతో కష్టపడి పనిచేసిందని, ఆ కష్టానికి ప్రేక్షకుల ప్రేమే అసలైన ఫలితమని తెలిపారు.

అనిల్ రావిపూడి ప్రశంసలు
కార్యక్రమంలో పాల్గొన్న దర్శకుడు అనిల్ రావిపూడి మాట్లాడుతూ, ‘పెద్ది’ ఇండస్ట్రీకి ఆక్సిజన్‌లాంటి విజయమని అన్నారు. థియేటర్లలో మళ్లీ సందడి తీసుకొచ్చిన సినిమా ఇదేనని పేర్కొన్నారు. సినిమాలో రామ్ చరణ్ నటనను చూస్తే హనుమంతుడే గుర్తొచ్చాడని, “తండ్రికి మించిన తనయుడు” అన్న మాటను నిజం చేశాడని ప్రశంసించారు.

ఈ సందర్భంగా చిరంజీవి, రామ్ చరణ్ ఇద్దరూ సంగీత దర్శకుడు ఏఆర్ రెహమాన్, సినిమాటోగ్రాఫర్ రత్నవేలు, ఆర్ట్ డైరెక్టర్ అవినాష్ కొల్లా, నిర్మాత సతీష్ కిలారు, చిత్రంలో నటించిన జగపతిబాబు, శివరాజ్ కుమార్, జాన్వీ కపూర్‌తో పాటు ప్రతి టెక్నీషియన్‌ను ప్రత్యేకంగా అభినందించారు.

‘పెద్ది’ విజయోత్సవం… భావోద్వేగాల వేడుక
‘పెద్ది మెగా బ్లాక్‌బస్టర్ ఈవెంట్’ కేవలం విజయోత్సవంగా మాత్రమే కాకుండా, రామ్ చరణ్ నటుడిగా సాధించిన పరిణతి, దర్శకుడు బుచ్చిబాబు ప్రతిభ, చిత్రబృందం రెండేళ్ల కష్టానికి ప్రేక్షకులు ఇచ్చిన అపూర్వమైన గౌరవానికి ప్రతీకగా నిలిచింది. ముఖ్యంగా “చరణ్ కనిపించలేదు… పెద్ది మాత్రమే కనిపించాడు”, “న్యూ ఏజ్ మెగాస్టార్”, “పెద్ది రిలీజ్ తర్వాత మా పాప నన్ను ‘పెద్ది’ అని పిలుస్తోంది” వంటి వ్యాఖ్యలు ఈ వేడుకలో ప్రధాన ఆకర్షణగా నిలిచి అభిమానులను విశేషంగా ఆకట్టుకున్నాయి.