Objection My Lord WebSeries Telugu Review

వెబ్ సిరీస్ : అబ్జెక్షన్ మై లార్డ్

స్ట్రీమింగ్ ఆన్ : జీ 5

రేటింగ్ : 2.75/5

నటీనటులు : శ్రీకాంత్, ముఖేష్ రిషి, అనన్య శర్మ, స్నేహల్ కామత్, సమీర్, జెమిని సురేష్ తదితరులు..

దర్శకత్వం, కథ, స్క్రీన్‌ప్లే : సంతోష్ అయ్యప్పన్

నిర్మాత : రాజ్‌కుమార్ ఆకెళ్ల

సంగీత దర్శకుడు : అరుణ్ చిలువేరు

షో రన్నర్, సినిమాటోగ్రాఫర్ (డీవోపీ) : సూర్య

ఎడిటర్ : సాయి కిశోర్ కొర్నాని

విడుదల తేదీ : 31 జూలై 2026 (ZEE5)

Objection My Lord WebSeries Telugu Review

కథ విషయానికొస్తే :
పరశురామ్ (శ్రీకాంత్) ఒకప్పుడు టాలెంటెడ్ లాయర్. అయితే ఓ వ్యక్తిగత కారణంతో కోర్టులో వాదనలు వినిపించడం మానేసి నోటరీ పరశురామ్‌గా జీవనం సాగిస్తుంటాడు. అందరూ అతడిని ఫెయిల్యూర్ లాయర్‌గా చూస్తుంటారు. అదే సమయంలో వేద (అనన్య శర్మ) అతడి వద్ద అసిస్టెంట్‌గా చేరుతుంది. ఒక రోజు నారాయణ అనే వ్యక్తి కోర్టు ఎదుట ఆత్మాహుతి చేసుకోవడంతో పరశురామ్ జీవితంలో ఊహించని మలుపు వస్తుంది. నారాయణ కూతురు సమీరా అదృశ్యమైన కేసును అతడు టేకప్ చేస్తాడు. పోలీసుల నిర్లక్ష్యం, అధికారుల వైఖరి వెనుక పెద్ద కుట్ర ఉందని తెలుసుకుంటాడు. మరోవైపు పరశురామ్ గతంలో 18 ఏళ్లు మానసిక ఆస్పత్రిలో చికిత్స పొందాడనే విషయం కూడా బయటపడుతుంది. ఈ కేసులో అతడికి ఎదురుగా ఓటమి ఎరుగని సీనియర్ లాయర్ విశ్వనాథ్ (ముఖేష్ రిషి) నిలబడతాడు. చివరకు సమీరా ఏమైంది? నారాయణ ఎందుకు ఆత్మహత్య చేసుకున్నాడు? పరశురామ్ నిజాన్ని ఎలా బయటపెట్టాడు? అనేదే మిగిలిన కథ.

నటీనటుల పెర్ఫార్మెన్స్ గురించి..
పరశురామ్ పాత్రలో శ్రీకాంత్ చాలా సహజంగా నటించాడు. ఎలాంటి హీరోయిజం లేకుండా ఒక సాధారణ లాయర్‌గా కనిపిస్తూ పాత్రకు న్యాయం చేశాడు. కోర్టు సన్నివేశాల్లో అతని హావభావాలు ఆకట్టుకుంటాయి. అనన్య శర్మకు మంచి ప్రాధాన్యం ఉన్న పాత్ర దక్కింది. శ్రీకాంత్‌కు మంచి సపోర్ట్‌గా నిలిచింది. ముఖేష్ రిషి పాత్ర బలంగా ఉండాల్సిన చోట అంతగా ప్రభావం చూపించలేదు. స్నేహల్ కామత్, సమీర్, జెమిని సురేష్ తమ పాత్రల పరిధిలో బాగానే నటించారు.

టెక్నీకల్ టీమ్ గురించి..
దర్శకుడు సంతోష్ అయ్యప్పన్ కోర్ట్‌రూమ్ డ్రామాను రియలిస్టిక్‌గా చూపించే ప్రయత్నం చేశాడు. రైటర్‌గా కూడా కొన్ని మంచి ట్విస్టులు రాశాడు. ముఖ్యంగా సమీరా కేసుకు సంబంధించిన మిస్టరీని చివరి వరకు కొనసాగించడం బాగుంది. నిర్మాణ విలువలు వెబ్ సిరీస్ స్థాయిని మించి ఉన్నాయి. సినిమాటోగ్రఫీ, బ్యాక్‌గ్రౌండ్ స్కోర్ కథకు తగ్గట్టుగా ఉన్నాయి. ఎడిటింగ్ కూడా బాగానే ఉన్నప్పటికీ మొదటి రెండు ఎపిసోడ్లు కాస్త నెమ్మదిగా అనిపిస్తాయి.

వెబ్ సిరీస్ ఎలా ఉందంటే..
సాధారణ లాయర్ ఒక అసాధ్యంగా కనిపించే కేసును ఛేదించే కథతో ఇప్పటికే ఎన్నో సినిమాలు వచ్చినా, అబ్జెక్షన్ మై లార్డ్ వాటిని గుర్తు చేస్తుంది. అయినప్పటికీ క్రైమ్ ఇన్వెస్టిగేషన్, కోర్టు వాదనలను కలిపి ఆసక్తికరంగా నడిపించే ప్రయత్నం చేసింది. మొదటి రెండు ఎపిసోడ్లు పాత్రల పరిచయానికే ఎక్కువ సమయం తీసుకోవడం వల్ల నెమ్మదిగా అనిపిస్తుంది. అయితే నారాయణ కేసు మొదలైన తర్వాత కథ వేగం పెరుగుతుంది. చిన్న చిన్న క్లూలతో మిస్టరీని ఛేదించే విధానం ఆకట్టుకుంటుంది. సమీరాకు జరిగిన అన్యాయం, తండ్రి భావోద్వేగాలను చూపించిన సన్నివేశాలు బాగా వర్కౌట్ అయ్యాయి. అయితే బలమైన ప్రతినాయకుడు లేకపోవడం పెద్ద లోపంగా అనిపిస్తుంది. ముఖేష్ రిషి పాత్రను మరింత పవర్‌ఫుల్‌గా రాసుంటే కోర్టు సన్నివేశాలు ఇంకా ఎంగేజింగ్‌గా ఉండేవి. కొన్ని చోట్ల లాజిక్స్‌ను పక్కన పెట్టినట్లు అనిపిస్తుంది. లా సెక్షన్ల గురించి వచ్చే డైలాగ్స్ కూడా సాధారణ ప్రేక్షకులకు కొంత భారంగా అనిపించే అవకాశం ఉంది. అయినా ఫైట్లు, ఎలివేషన్లు, కమర్షియల్ హంగులు లేకుండా కథను రియలిస్టిక్‌గా చెప్పడం ఈ సిరీస్‌కు ప్లస్ పాయింట్.

ప్లస్ పాయింట్స్ :
శ్రీకాంత్ సహజమైన నటన
కోర్ట్‌రూమ్ డ్రామా, ఇన్వెస్టిగేషన్ ఎపిసోడ్స్
కొన్ని మంచి ట్విస్టులు
రియలిస్టిక్ టేకింగ్
నిర్మాణ విలువలు

మైనస్ పాయింట్స్ :
నెమ్మదిగా సాగే తొలి రెండు ఎపిసోడ్లు
కొన్ని లాజిక్ లోపాలు
క్లైమాక్స్ ముందే ఊహించగలగడం
ఎక్కువ లీగల్ డైలాగ్స్

ఫైనల్‌గా చెప్పాలంటే..
అబ్జెక్షన్ మై లార్డ్ కొత్త కథ కాకపోయినా, రియలిస్టిక్ కోర్ట్‌రూమ్ థ్రిల్లర్‌గా ఓ మోస్తరు స్థాయిలో ఆకట్టుకుంటుంది. శ్రీకాంత్ నటన, ఇన్వెస్టిగేషన్ సన్నివేశాలు, కొన్ని ట్విస్టులు సిరీస్‌కు బలంగా నిలుస్తాయి. అయితే నెమ్మదిగా సాగే ప్రారంభం, ప్రెడిక్టబుల్ క్లైమాక్స్ ప్రభావాన్ని తగ్గిస్తాయి. కోర్ట్‌రూమ్ డ్రామాలు ఇష్టపడేవారు ఒకసారి చూడదగ్గ డీసెంట్ వెబ్ సిరీస్.