Dr.VK Naresh Interview About Crazy Kalyanam

ప్రస్తుతం ప్రేక్షకులను థియేటర్లకు రప్పించడం సినిమాలకు పెద్ద సవాల్‌గా మారిందని, ఇలాంటి పరిస్థితుల్లో హాస్యం, భావోద్వేగాలతో కూడిన నిజాయతీగల కుటుంబ కథా చిత్రాలే ప్రేక్షకులకు చేరువవుతాయని సీనియర్ నటుడు ‘నవరసరాయ’ డా. నరేష్ విజయ కృష్ణ అన్నారు. తల్లిదండ్రులు, పిల్లల మధ్య ఉండే ఎమోషన్స్‌తోపాటు కంప్లీట్ ఎంటర్‌‌టైనర్‌‌గా రూపొందించిన చిత్రం ‘క్రేజీ కళ్యాణం’ అని ఆయన తెలిపారు. ఈ సినిమాలో తాను చేసిన ఆరు నిమిషాల నవరసాల సన్నివేశం ప్రత్యేక ఆకర్షణగా నిలుస్తుందని వెల్లడించారు.

‘నవరసరాయ’ డా. నరేష్ విజయ కృష్ణ, అనుపమ పరమేశ్వరన్, తరుణ్ భాస్కర్, ‘రాజు వెడ్స్ రాంబాయి’ ఫేమ్ అఖిల్ ఉడ్డెమారి ప్రధాన పాత్రల్లో నటించిన చిత్రం ‘క్రేజీ కల్యాణం’. యారో సినిమాస్ బ్యానర్‌పై ప్రొడక్షన్ నంబర్ 2గా ప్యాషనేట్ ప్రొడ్యూసర్ బూసం జగన్ మోహన్ రెడ్డి ఈ చిత్రాన్ని నిర్మించగా, బద్రప్ప గాజుల దర్శకత్వం వహించారు. దసరా పండుగ సందర్భంగా అక్టోబర్ 16న ఈ చిత్రం ప్రపంచవ్యాప్తంగా థియేటర్లలో విడుదల కానుంది. ఈ నేపథ్యంలో నిర్వహించిన ఇంటర్వ్యూలో నరేష్ విజయ కృష్ణ సినిమా విశేషాలను పంచుకున్నారు.

ఫ్యామిలీ ఎంటర్‌టైనర్స్‌కు మళ్లీ ఆదరణ
ప్రపంచ సినిమాతో పోటీ పడాల్సిన పరిస్థితుల్లో తెలుగు చిత్ర పరిశ్రమలో విజయాల శాతం తక్కువగా ఉంటోందని నరేష్ పేర్కొన్నారు. అయితే సినిమా జానర్లు ఎప్పటికప్పుడు మారుతుంటాయని, ప్రస్తుతం కుటుంబ కథా చిత్రాలకు ప్రేక్షకుల్లో ఆదరణ పెరుగుతోందని అన్నారు. నిజాయతీతో కూడిన కథ, సహజమైన పాత్రలు, ప్రేక్షకులను కదిలించే భావోద్వేగాలు ఉంటే ఫ్యామిలీ ఎంటర్‌టైనర్స్ తప్పకుండా విజయాన్ని అందుకుంటాయని అభిప్రాయపడ్డారు. ‘క్రేజీ కల్యాణం’ కూడా అదే కోవకు చెందిన చిత్రమని, దర్శకుడు బద్రప్ప గాజుల, నిర్మాత జగన్ మోహన్ రెడ్డి ఎంతో ప్యాషన్‌తో ఈ సినిమాను రూపొందించారని చెప్పారు. దసరా వంటి పెద్ద పండుగ సమయంలో కుటుంబమంతా కలిసి థియేటర్లలో ఆనందించేలా ఈ సినిమా ఉంటుందని ధీమా వ్యక్తం చేశారు.

నాలుగు పాత్రలు.. కథకు నాలుగు స్తంభాలు
ఈ సినిమా కథలో తాను, తరుణ్ భాస్కర్, అనుపమ పరమేశ్వరన్, అఖిల్ ఉడ్డెమారి పోషించిన పాత్రలు నాలుగు స్తంభాల్లాంటివని నరేష్ వివరించారు. ప్రతి పాత్రకూ కథలో ప్రత్యేక స్థానం ఉందని, వాటిలో తన పాత్రకు కొంత ఎక్కువ ప్రాధాన్యత ఉంటుందని తెలిపారు. హీరో అంటే పాటలు, ఫైట్లు, రొమాన్స్ చేసే వ్యక్తి మాత్రమే కాదని, కథను ముందుకు నడిపిస్తూ ప్రేక్షకులను మెప్పించే పాత్ర కూడా హీరోనేనని ఆయన అభిప్రాయపడ్డారు. ఓ గ్రామంలోని మధ్యతరగతి కుటుంబం చుట్టూ తిరిగే ఈ కథలో తల్లిదండ్రులు, పిల్లల మధ్య జరిగే భావోద్వేగ సంఘర్షణ ప్రధానాంశమని చెప్పారు. ముఖ్యంగా తండ్రి, కుమార్తె మధ్య ఉండే అనుబంధం విశ్వవ్యాప్తమైనదని, ఎప్పటికీ పాతబడని భావోద్వేగమని పేర్కొన్నారు.

బద్రప్పలో కె. విశ్వనాథ్ గారి శైలి కనిపించింది
దర్శకుడు బద్రప్ప గాజుల పనితీరుపై నరేష్ విజయ కృష్ణ ప్రశంసలు కురిపించారు. కథలోని స్థానికతను వదులుకోకుండా, కొత్త పద్ధతిలో పాత్రలను ఆవిష్కరించడం, వాటికి అర్థవంతమైన ముగింపు ఇవ్వడం బద్రప్ప ప్రత్యేకత అని అన్నారు. ఈ లక్షణాలే తనకు దిగ్గజ దర్శకుడు కె. విశ్వనాథ్‌ను గుర్తుకు తెచ్చాయని తెలిపారు. కె. విశ్వనాథ్ సినిమాల్లో కనిపించే భావోద్వేగాల ప్రభావం ‘క్రేజీ కల్యాణం’లోనూ కనిపిస్తుందని, అందుకే బద్రప్పను ఆయనతో పోల్చానని వివరించారు. తరుణ్ భాస్కర్ పోషించిన బాలరాజు పాత్ర ప్రతి ఊరిలోనూ కనిపించే వ్యక్తిని గుర్తు చేస్తుందని, అనుపమ పాత్ర మధ్యతరగతి అమ్మాయిల భావాలను ప్రతిబింబిస్తుందని చెప్పారు. అఖిల్ కూడా తన పాత్రలో చక్కగా నటించాడని ప్రశంసించారు.

ఆరు నిమిషాల సీన్.. తొమ్మిది భావోద్వేగాలు
‘క్రేజీ కల్యాణం’లో తన పాత్రకు సంబంధించిన ప్రత్యేకతను వివరిస్తూ నరేష్ ఆసక్తికరమైన విషయాన్ని వెల్లడించారు. సుమారు 350 మంది పాత్రలు ఉండే నేపథ్యంలో, తొమ్మిది పాత్రలతో ఒక్కొక్క భావోద్వేగాన్ని వ్యక్తపరుస్తూ సాగే దాదాపు ఆరు నిమిషాల సుదీర్ఘ సన్నివేశం సినిమాలో ఉంటుందని తెలిపారు. ఆ సీన్‌లో తొమ్మిది రకాల భావాలను పలికించడం తనకు మొదట్లో సవాల్‌గా అనిపించిందని, అలాంటి సన్నివేశానికి ప్రత్యేకమైన రిఫరెన్స్ కూడా దొరకలేదని చెప్పారు. తన సందేహాన్ని దర్శకుడు బద్రప్పతో పంచుకున్నప్పుడు, ‘నవరసాల సీన్‌కు మీరే రిఫరెన్స్’ అని ఆయన చెప్పినట్లు గుర్తుచేసుకున్నారు. చివరకు ఆ సుదీర్ఘ సన్నివేశాన్ని సింగిల్ టేక్‌లో పూర్తి చేశానని వెల్లడించారు. తన ‘నవరసరాయ’ బిరుదును ఈ సినిమాలో తొలిసారిగా ఉపయోగిస్తున్నామని తెలిపారు.

ఎమోషన్ కోసం ప్రత్యేకంగా డబ్బింగ్
విభిన్న ప్రాంతాల యాసల్లో నటించిన అనుభవం తనకు ఉందని చెప్పిన నరేష్, తెలంగాణ యాసపై దర్శకుడు బద్రప్పకు మంచి పట్టుందని పేర్కొన్నారు. సినిమాలోని భావోద్వేగాలు ప్రేక్షకులకు సహజంగా చేరాలనే ఉద్దేశంతో నాలుగైదు రోజుల పాటు డబ్బింగ్ చెప్పానని, సన్నివేశాల్లోని ఎమోషన్‌ను సరిగ్గా పలికించేందుకు నిలబడి డబ్బింగ్ చెప్పిన సందర్భాలున్నాయని తెలిపారు. స్క్రిప్ట్ దశ నుంచే ఈ సినిమాతో తన ప్రయాణం కొనసాగుతోందని, అందుకే చిత్ర విజయంపై తనకు నమ్మకం ఉందని చెప్పారు. నిర్మాత జగన్ మోహన్ రెడ్డికి సినిమా పట్ల ఉన్న ఆసక్తి, అంకితభావం అభినందనీయమని పేర్కొన్నారు.

కథ, పాత్ర నచ్చితేనే సినిమా
తాను ఎప్పుడూ పాత్రకు ప్రాధాన్యత ఇస్తానని, చిన్న సినిమా, పెద్ద సినిమా అనే భేదం చూడనని నరేష్ స్పష్టం చేశారు. పాన్ ఇండియా సినిమాల్లో నటించే అవకాశాలు వచ్చినప్పటికీ, పాత్ర నచ్చకపోతే వాటిని అంగీకరించలేదని తెలిపారు. ప్రస్తుతం ఎంతోమంది యువ దర్శకులు తనను కలిసి కథలు చెబుతున్నారని, ‘క్రేజీ కల్యాణం’ కథను కూడా బద్రప్ప మొదట తనకే వినిపించారని చెప్పారు. యువ ఫిల్మ్‌మేకర్స్ తనపై ఉంచిన నమ్మకాన్ని నిలబెట్టుకునేలా పనిచేయడం తన బాధ్యతగా భావిస్తానని అన్నారు.

దసరాకు నవ్వులు, అనుబంధాలు
హింస, రక్తపాతాలకు దూరంగా రక్త సంబంధాలకు ప్రాధాన్యతనిచ్చిన కుటుంబ కథా చిత్రంగా ‘క్రేజీ కల్యాణం’ ప్రేక్షకుల ముందుకు వస్తోందని నరేష్ తెలిపారు. ఇప్పటికే టీజర్, ట్రైలర్‌కు మంచి స్పందన లభించిందని, అదే ఆదరణ సినిమాకు కూడా దక్కుతుందని ఆశాభావం వ్యక్తం చేశారు. ఈ దసరాకు కుటుంబ సభ్యులతో కలిసి థియేటర్లకు వెళ్లి ఆస్వాదించదగిన చిత్రంగా ‘క్రేజీ కల్యాణం’ నిలుస్తుందని ఆయన ధీమా వ్యక్తం చేశారు. నవ్వులతో పాటు మనసును తాకే భావోద్వేగాలను అందించే ఈ సినిమా అక్టోబర్ 16న ప్రేక్షకుల ముందుకు రానుంది.