Ravi Teja–Vivek Athreya Combo Title Reveal

మాస్ మహారాజా రవితేజ, టాలెంటెడ్ డైరెక్టర్ వివేక్ ఆత్రేయ కాంబినేషన్‌లో తెరకెక్కనున్న సినిమాపై టాలీవుడ్‌లో ఆసక్తి పెరుగుతోంది. ఇటీవల ‘ఇరుముడి’తో బ్లాక్‌బస్టర్ విజయాన్ని అందుకున్న రవితేజ.. ప్రస్తుతం వరుస ప్రాజెక్టులతో బిజీగా ఉన్నారు. ఈ క్రమంలో వివేక్ ఆత్రేయ దర్శకత్వంలో ఆయన చేయనున్న సినిమా ఇప్పుడు హాట్ టాపిక్‌గా మారింది. తాజాగా ఈ ప్రాజెక్టుకు సంబంధించి మేకర్స్ ఇచ్చిన అప్‌డేట్ అభిమానుల్లో క్యూరియాసిటీని మరింత పెంచుతోంది.

బ్రిడ్జ్ ప్రొడక్షన్స్ బ్యానర్‌పై లక్ష్మణ్, శ్రీని నిర్మిస్తున్న ఈ సినిమాకు సంబంధించి ఇప్పటివరకు టైటిల్‌ను అధికారికంగా ప్రకటించలేదు. అయితే, తాజాగా మేకర్స్ విడుదల చేసిన ఆసక్తికరమైన పోస్టు, రేపు రాబోయే అనౌన్స్‌మెంట్‌పై అంచనాలను పెంచింది. “ఒకడు హారర్ సినిమా అంటాడు.. ఇంకోడు ఏదో అంటాడు.. ఇంకొకడు వచ్చి ఇంకేదో అంటాడు. ఇంతకీ టైటిల్ ఏమైంటుందో?” అంటూ సినిమా జానర్, టైటిల్‌పై జరుగుతున్న చర్చలకు మరింత ఆసక్తికరమైన మలుపు ఇచ్చారు. అక్టోబర్ 11న ఉదయం 10.30 గంటలకు అసలు టైటిల్‌ను రివీల్ చేయనున్నట్లు ప్రకటించారు.

మరోవైపు, మేకర్స్ చేసిన ట్వీట్ ఈ ప్రాజెక్టుపై మరింత హైప్ తీసుకొచ్చింది. ‘నవ‘రవితేజ’ము’ అంటూ రవితేజ పేరుతో క్రేజీ వర్డ్‌ప్లే చేసిన టీమ్.. రేపు పూజా కార్యక్రమానికి సంబంధించిన వీడియోతో పాటు టైటిల్ డాక్యుమెంటరీ వీడియోను విడుదల చేయనున్నట్లు వెల్లడించింది. దీంతో ఈ సినిమా టైటిల్ ఎలా ఉండబోతోంది? వివేక్ ఆత్రేయ ఈసారి ఎలాంటి కథతో రవితేజను చూపించబోతున్నారు? అనే ప్రశ్నలు అభిమానుల్లో ఆసక్తిని రేకెత్తిస్తున్నాయి.

రవితేజ తనదైన ఎనర్జీ, మాస్ అప్పీల్‌తో ప్రేక్షకులను అలరిస్తుంటారు. మరోవైపు వివేక్ ఆత్రేయ తనదైన కథాకథనాలతో ప్రత్యేక గుర్తింపు తెచ్చుకున్నారు. ఈ ఇద్దరి కాంబినేషన్‌లో సినిమా అనగానే సహజంగానే అంచనాలు ఏర్పడుతున్నాయి. రవితేజ ఇమేజ్‌కు తగ్గట్టుగా, ఆయన స్క్రీన్ ప్రెజెన్స్‌ను కొత్తగా ఆవిష్కరించేలా వివేక్ ఆత్రేయ పాత్రను డిజైన్ చేస్తున్నారనే ఆసక్తికరమైన చర్చ కూడా సాగుతోంది. అయితే, సినిమా కథ, జానర్, టైటిల్‌కు సంబంధించిన పూర్తి వివరాలు తెలియాలంటే అధికారిక ప్రకటన వరకు వేచి చూడాల్సిందే.

ఇదిలా ఉంటే, రవితేజ నటించిన ‘ఇరుముడి’ సినిమా విడుదలై 50 రోజులు పూర్తి చేసుకోవడం విశేషం. దీంతో పాటు దర్శకుడు హాసిత్ గోలితోనూ రవితేజ ఓ సినిమా చేయడానికి కమిట్ అయ్యారు. ఇలా వరుస ప్రాజెక్టులతో దూసుకుపోతున్న మాస్ మహారాజా.. వివేక్ ఆత్రేయతో ఎలాంటి కొత్త ప్రయోగానికి సిద్ధమవుతున్నారో తెలియాలంటే రేపటి టైటిల్ అనౌన్స్‌మెంట్ వరకు వెయిట్ చేయాల్సిందే!