Nidhhi Agerwal Mythological Thriller Announced

హీరోయిన్‌గా వైవిధ్యమైన కథలను ఎంచుకుంటూ తనకంటూ ప్రత్యేక గుర్తింపు తెచ్చుకుంటున్న నిధి అగర్వాల్ పుట్టినరోజు సందర్భంగా ఓ ఇంట్రెస్టింగ్ ప్రాజెక్ట్‌ను మేకర్స్ ప్రకటించారు. వరాహ్ ఫిల్మ్స్ బ్యానర్‌పై ప్రొడక్షన్ నంబర్ 1గా రూపొందనున్న ఈ కొత్త చిత్రం మైథాలజీ థ్రిల్లర్‌గా తెరకెక్కనుంది. నిధి అగర్వాల్ ప్రధాన పాత్రలో నటిస్తున్న ఈ సినిమాకు ‘తంత్ర’ ఫేమ్ శ్రీనివాస్ గోపిశెట్టి దర్శకత్వం వహిస్తున్నారు. సునీత్ పడోల్కర్ నిర్మాతగా వ్యవహరిస్తున్నారు.

సినిమా అనౌన్స్‌మెంట్‌తో పాటు విడుదల చేసిన ఫస్ట్ లుక్ పోస్టర్ ఈ ప్రాజెక్ట్‌పై ఆసక్తిని మరింత పెంచుతోంది. పోస్టర్‌లో నిధి అగర్వాల్ సంప్రదాయ చీరకట్టులో, భారీగా అలంకరించిన బంగారు ఆభరణాలతో కనిపిస్తున్నారు. నుదుటన బొట్టు, తలపై నుదుటి ఆభరణం, చెవులకు జిమికీలు, మెడలో సంప్రదాయ హారం వంటి అలంకరణ ఆమె పాత్రలోని డెప్త్‌ను తెలియజేస్తున్నాయి. అయితే పోస్టర్‌లో అందరి దృష్టిని ఆకర్షిస్తున్న మరో అంశం ఆమె చేతిలోని వెలుగుతున్న దీపం. ఆ దీపం నుంచి వెలువడుతున్న కాంతి నిధి ముఖంతో పాటు ఆమె చుట్టూ ఉన్న చీకటిని ఛేదిస్తున్నట్టుగా డిజైన్ చేశారు. ఆమె వెనుక భాగంలో కనిపిస్తున్న బహుభుజాల దేవత షాడో పోస్టర్‌కు మిస్టరీ, దైవత్వం, థ్రిల్లింగ్ టచ్‌ను తీసుకొచ్చింది. ఆలయ నిర్మాణాన్ని తలపించే నేపథ్యం, గాఢమైన రంగులు, వెలుగు-చీకటి కాంట్రాస్ట్ కలసి సినిమా ఏ తరహా ప్రపంచంలో సాగబోతుందనే ఆసక్తిని కలిగిస్తున్నాయి.

ఈ ఫస్ట్ లుక్‌లో నిధి అగర్వాల్ గెటప్ మాత్రమే కాకుండా ఆమె పాత్రలో దాగి ఉన్న మిస్టరీని కూడా హైలైట్ చేసినట్లు అనిపిస్తోంది. ఇప్పటివరకు ఆమె కనిపించిన పాత్రలకు భిన్నంగా, మరింత గంభీరమైన, డిఫరెంట్ షేడ్స్ ఉన్న పాత్రలో నిధి కనిపించబోతున్నారనే అంచనాలను ఈ పోస్టర్ కలిగిస్తోంది.

శ్రీనివాస్ గోపిశెట్టి ఈ సినిమాను హీరోయిన్ ఓరియెంటెడ్ కథాంశంతో తెరకెక్కించనున్నారు. మైథాలజీ అంశాలను థ్రిల్లింగ్ ఎలిమెంట్స్‌తో జోడించి దర్శకుడు ఓ పవర్‌ఫుల్ కథను సిద్ధం చేసినట్లు చిత్ర బృందం తెలిపింది. కథలోని మిస్టరీ, నిధి పోషించే పాత్ర, దాని చుట్టూ అల్లుకున్న పౌరాణిక అంశాలు సినిమాకు ప్రధాన ఆకర్షణగా నిలవనున్నాయి.

సినిమా ప్రారంభోత్సవ కార్యక్రమంలో పీ. అశోక్, పీ. రేణుక కెమెరా స్విచ్ ఆన్ చేయగా, హుర్మత్ సర్నా క్లాప్ ఇచ్చారు. నిధి అగర్వాల్‌తో పాటు చిత్ర యూనిట్ సభ్యులు ఈ కార్యక్రమంలో పాల్గొన్నారు. ఈ మూవీతోపాటు ఇతర నటీనటులు, సాంకేతిక నిపుణుల వివరాలను కూడా మేకర్స్ త్వరలో వెల్లడించనున్నారు.