“రోమాంచకం”లో సహజమైన హాస్యం, ప్రేమ, ఉత్కంఠ కలిసిన ఎంటర్‌టైన్‌మెంట్ ఉంటుంది వంగా
ప్రస్తుతం మా దృష్టంతా ప్రభాస్ ‘స్పిరిట్’ పైనే… – ప్రొడ్యూసర్ ప్రణయ్ రెడ్డి
బ్లాక్‌బస్టర్ దర్శకుడు సందీప్ రెడ్డి వంగా సమర్పణలో భద్రకాళీ పిక్చర్స్ బ్యానర్‌పై రూపొందుతున్న యూత్‌ఫుల్ ఎంటర్‌టైనర్ “రోమాంచకం”. సుమంత్ ప్రభాస్, అనంతిక సనిల్ కుమార్ జంటగా నటిస్తున్న ఈ చిత్రాన్ని ప్రణయ్ రెడ్డి వంగా నిర్మిస్తున్నారు. నూతన దర్శకుడు వేణుగోపాల్ రెడ్డి ఈ సినిమాతో దర్శకుడిగా పరిచయం అవుతున్నారు. ఈ చిత్రం ఈ నెల 3న ప్రపంచవ్యాప్తంగా గ్రాండ్ థియేట్రికల్ రిలీజ్‌కు సిద్ధమవుతోంది.
ఈ సందర్భంగా జరిగిన ఇంటర్వ్యూలో నిర్మాత ప్రణయ్ రెడ్డి వంగా “రోమాంచకం” విశేషాలతో పాటు తమ బ్యానర్ భవిష్యత్ ప్రాజెక్ట్స్ గురించి ఆసక్తికర విషయాలు పంచుకున్నారు.
Producer Pranay Reddy Vanga Confident About Romanchakam
ప్రొడక్షన్‌ను కేవలం వరుసగా సినిమాలు చేయాలనే ఉద్దేశంతో తాము చేయడం లేదని ప్రణయ్ రెడ్డి వంగా తెలిపారు. తమ అభిరుచికి దగ్గరగా ఉండే కథలు వచ్చినప్పుడే వాటిని ముందుకు తీసుకెళ్తామని చెప్పారు. గతంలో కొన్ని కథలు విన్నప్పటికీ అవి తమ సెన్సిబిలిటీస్‌కు సరిపోకపోవడంతో వదిలేశామని తెలిపారు. “రోమాంచకం” కథలో మాత్రం హ్యూమర్, థ్రిల్లింగ్ ఎలిమెంట్స్‌తో పాటు స్నేహితుల మధ్య జరిగే సరదా సంఘటనలు ఆకట్టుకున్నాయని చెప్పారు.
దర్శకుడు వేణుగోపాల్ రెడ్డి గత మూడు నాలుగేళ్లుగా తమతో కలిసి ప్రయాణిస్తున్నారని, ఆయన చెప్పిన స్క్రిప్ట్ తమను బాగా ఆకట్టుకుందని ప్రణయ్ వెల్లడించారు. సందీప్ రెడ్డి వంగా, వేణుగోపాల్ రెడ్డి దర్శకులుగా పూర్తిగా భిన్నమైన శైలులు కలిగిన వారైనా, వేణు చెప్పిన కథలో తమకు నచ్చిన ఒక ప్రత్యేకమైన కామన్ పాయింట్ ఉందన్నారు. ముందుగా ఒక సీన్ తెరకెక్కించి చూపించమని చెప్పగా, దాని అవుట్‌పుట్ చూసిన తర్వాత వేణుగోపాల్‌పై పూర్తి నమ్మకం ఏర్పడిందని తెలిపారు.
“రోమాంచకం” పూర్తిగా క్యారెక్టర్ డ్రివెన్ మూవీ అని ప్రణయ్ రెడ్డి వంగా చెప్పారు. ఇంజినీరింగ్ పూర్తి చేసిన తర్వాత జీవితంలోకి అడుగుపెట్టిన ఒక యువకుడి ప్రయాణం, అతని ప్రేమకథ, స్నేహితుల మధ్య ఉండే కన్ఫ్యూజన్స్ చుట్టూ కథ సాగుతుందని తెలిపారు. ముఖ్యంగా నాలుగు ప్రధాన పాత్రల మధ్య జరిగే సంఘటనలను దర్శకుడు చాలా సహజంగా తెరకెక్కించారని చెప్పారు.
సినిమాలో కామెడీని ఎక్కడా బలవంతంగా పెట్టలేదని, కథలోంచి సహజంగా వచ్చే హాస్యమే ప్రేక్షకులను నవ్విస్తుందని అన్నారు. రెండు గంటల ఇరవై నిమిషాల నిడివి ఉన్నప్పటికీ సినిమా చాలా వేగంగా, జోవియల్‌గా సాగుతుందని, ప్రేక్షకులకు ఎక్కడా బోర్ అనిపించదనే నమ్మకం వ్యక్తం చేశారు.
ఈ చిత్రానికి సంగీత దర్శకుడు వాసుకి అందించిన సంగీతం మరో ప్రత్యేక ఆకర్షణగా నిలుస్తుందని ప్రణయ్ తెలిపారు. తమ బ్యానర్ నుంచి వచ్చిన సినిమాలకు సంగీతం విషయంలో మంచి గుర్తింపు ఉందని, “రోమాంచకం” కూడా ఆ సంప్రదాయాన్ని కొనసాగిస్తూ మంచి మ్యూజికల్ ఎక్స్‌పీరియన్స్ ఇస్తుందని చెప్పారు.
ఈ ప్రాజెక్ట్ ఓకే అయిన తర్వాత సందీప్ రెడ్డి వంగా సినిమా మేకింగ్‌లో పెద్దగా జోక్యం చేసుకోలేదని తెలిపారు. ప్రస్తుతం ఆయన “స్పిరిట్” పనులతో బిజీగా ఉన్నారని చెప్పారు. సినిమా పూర్తయిన తర్వాత ఫస్ట్ కట్ చూసిన సందీప్ రెడ్డి వంగా చాలా హ్యాపీగా ఫీలయ్యారని వెల్లడించారు.
“రోమాంచకం”కు సెన్సార్ నుంచి U/A సర్టిఫికేట్ లభించిందని, యూత్‌తో పాటు ఫ్యామిలీ ఆడియెన్స్ కూడా ఎలాంటి ఇబ్బంది లేకుండా సినిమాను ఆస్వాదించవచ్చని ప్రణయ్ అన్నారు. వ్యక్తిగతంగా తనకు కామెడీ సినిమాలంటే చాలా ఇష్టమని, నచ్చిన సినిమాలను పదే పదే చూడటం అలవాటని తెలిపారు.
దర్శకుడు వేణుగోపాల్ రెడ్డి ప్రొడ్యూసర్ ఫ్రెండ్లీ ఫిల్మ్‌మేకర్ అని ప్రశంసించారు. సినిమా కోసం మరింత బడ్జెట్ ఖర్చు చేయడానికి సిద్ధంగా ఉన్నప్పటికీ, అవసరమైనంత మాత్రమే ఖర్చు చేయాలని వేణు భావించారని చెప్పారు. ముందుగా నిర్ణయించిన బడ్జెట్‌లోనే సినిమాను సమర్థవంతంగా పూర్తి చేయడం ఆయన ప్రత్యేకత అని తెలిపారు.
సెన్సార్ వ్యవస్థపై కూడా ప్రణయ్ రెడ్డి వంగా తన అభిప్రాయాలను పంచుకున్నారు. అమెరికాలో సెన్సార్ వ్యవస్థను ప్రధానంగా ఇండస్ట్రీ నిర్వహిస్తుందని, మన దేశంలో ప్రభుత్వం ఆధ్వర్యంలో నిబంధనలు అమలవుతాయని చెప్పారు. భారతీయ సంప్రదాయాలు, ప్రజల నమ్మకాలు, సామాజిక పరిస్థితులను దృష్టిలో పెట్టుకుని రూపొందించిన సెన్సార్ నిబంధనలు ప్రభుత్వ కోణంలో సరైనవేనని అభిప్రాయపడ్డారు. నిబంధనలపై ఫిల్మ్‌మేకర్స్‌కు ముందుగానే అవగాహన ఉంటే, చిత్ర నిర్మాణ సమయంలోనే తగిన జాగ్రత్తలు తీసుకోవచ్చని అన్నారు.
సినిమాలో సుమంత్ ప్రభాస్, అనంతిక సనిల్ కుమార్ ఇద్దరూ మంచి నటన కనబరిచారని తెలిపారు. వారి స్నేహితుల పాత్రల్లో నటించిన నటీనటులతో పాటు ఇతర కీలక పాత్రధారులు కూడా సినిమాకు బలంగా నిలిచారని చెప్పారు. టెక్నికల్ టీమ్‌లో ఎక్కువ మంది కొత్తవారే అయినప్పటికీ, ఎంతో ప్యాషన్‌తో పనిచేశారని పేర్కొన్నారు.
హైదరాబాద్, చెన్నైలో చిత్రీకరణ జరిపామని, కథ ప్రధానంగా హైదరాబాద్ నేపథ్యంలో సాగుతుందని తెలిపారు. అయితే సినిమాలో ఉపయోగించిన భాష, స్లాంగ్ కేవలం ఒక ప్రాంతానికే పరిమితం కాకుండా అందరికీ సులభంగా అర్థమయ్యేలా సహజమైన సంభాషణలతో ఉంటుందని చెప్పారు.
ఇక తమ భవిష్యత్ ప్రాజెక్ట్స్ గురించి మాట్లాడుతూ, ప్రస్తుతం తమ పూర్తి దృష్టి “స్పిరిట్”పైనే ఉందని ప్రణయ్ రెడ్డి వంగా తెలిపారు. ఇప్పటికే ఈ చిత్రం దాదాపు 40 శాతం షూటింగ్ పూర్తి చేసుకుందని, ప్రభాస్ 40 రోజుల పాటు షూటింగ్‌లో పాల్గొన్నారని వెల్లడించారు. “స్పిరిట్” పూర్తయిన తర్వాత కొత్త ప్రాజెక్టులపై నిర్ణయాలు తీసుకుంటామని చెప్పారు.
మరోవైపు వచ్చే ఏడాదితో “అర్జున్ రెడ్డి” విడుదలై పదేళ్లు పూర్తవుతున్న సందర్భంగా సినిమాను రీ-రిలీజ్ చేయాలనే ఆలోచన ఉందని తెలిపారు. కొన్ని ప్రత్యేక సన్నివేశాలను జోడించి ప్రేక్షకుల ముందుకు తీసుకురావాలని ప్లాన్ చేస్తున్నట్లు చెప్పారు.
టి-సిరీస్‌తో తమ అనుబంధం ఎంతో విజయవంతంగా కొనసాగుతోందని, ఆ సంస్థకు తమపై మంచి నమ్మకం ఉందని ప్రణయ్ పేర్కొన్నారు. భవిష్యత్‌లో తమకు నచ్చిన, బలమైన స్క్రిప్ట్స్ వస్తే చిన్న సినిమాలను నిర్మించడానికి కూడా ఎప్పుడూ సిద్ధంగా ఉంటామని స్పష్టం చేశారు.
మొత్తానికి ప్రేమ, స్నేహం, సహజమైన కామెడీ, థ్రిల్లింగ్ ఎలిమెంట్స్‌తో రూపొందిన “రోమాంచకం” యూత్‌తో పాటు ఫ్యామిలీ ఆడియెన్స్‌ను కూడా ఆకట్టుకునే పూర్తి స్థాయి ఎంటర్‌టైనర్‌గా ఉంటుందని నిర్మాత ప్రణయ్ రెడ్డి వంగా ధీమా వ్యక్తం చేశారు.
About the Author
