Yash Toxic Unveils Ladies & Ladies Promo

యాక్షన్ స్టార్ యశ్ ప్రధాన పాత్రలో దర్శకురాలు గీతూ మోహన్‌దాస్ రూపొందిస్తున్న పాన్‌వరల్డ్ యాక్షన్ డ్రామా ‘టాక్సిక్: ఎ ఫెయిరీటేల్ ఫర్ గ్రోన్-అప్స్’ పై ప్రేక్షకుల్లో భారీ అంచనాలు నెలకొన్నాయి. కేవీఎన్ ప్రొడక్షన్స్‌తో కలిసి మాన్‌స్టర్ మైండ్ క్రియేషన్స్ నిర్మిస్తున్న ఈ చిత్రం విడుదలకు ముందే తన ప్రత్యేక ప్రచారంతో సినీప్రియుల దృష్టిని ఆకర్షిస్తోంది. తాజాగా బుధవారం చిత్ర బృందం ‘లేడీస్ అండ్ లేడీస్’ పేరుతో ఓ ప్రత్యేక వీడియోను విడుదల చేసింది. ఈ వీడియోలో ‘టాక్సిక్’ ప్రపంచాన్ని శాసించే శక్తివంతమైన మహిళా పాత్రలను ఒక్కొక్కరిగా పరిచయం చేస్తూ సినిమాపై ఆసక్తిని మరింత పెంచింది.

వీడియోలో ముందుగా కనిపించిన నయనతార తన పవర్‌ఫుల్ స్క్రీన్ ప్రెజెన్స్‌తో ఆకట్టుకుంది. బుల్లెట్ బైక్‌పై స్టైలిష్‌గా ఎంట్రీ ఇస్తూ, ధైర్యసాహసాలతో నిండిన పాత్రలో కనిపించింది. ఆమె లుక్, బాడీ లాంగ్వేజ్, యాక్షన్ స్టైల్ సినిమాకు మరో ప్రధాన ఆకర్షణగా నిలవనున్నట్లు ఈ వీడియో ద్వారా స్పష్టమైంది. కియారా అద్వానీ తన పాత్రలో మిస్టీరియస్, ఎమోషనల్ షేడ్స్‌ను అద్భుతంగా ప్రదర్శించింది. ఆమె ప్రతి ఫ్రేమ్‌లోనూ ఒక రహస్యమైన భావాన్ని మోస్తూ కనిపించడం ప్రేక్షకుల్లో ఆసక్తిని రేకెత్తించింది. ఇక రుక్మిణి వసంత్ ఇంటెన్స్ క్యారెక్టర్‌లో కనిపిస్తూ తన సీరియస్ లుక్‌తో ఆకట్టుకోగా, తారా సుతారియా స్టైలిష్ ఆటిట్యూడ్‌తో ప్రత్యేక గుర్తింపు తెచ్చుకుంది. హుమా ఖురేషీ డాషింగ్ లుక్‌లో కనిపిస్తూ బలమైన మహిళా పాత్రలో మెప్పించింది. ఈ ఐదుగురు నటీమణుల పాత్రలకు కథలో కీలక ప్రాధాన్యం ఉండబోతున్నట్లు వీడియో చూస్తే అర్థమవుతోంది.

వీడియో ప్రారంభంలో ఇచ్చిన హెచ్చరిక ప్రత్యేక ఆకర్షణగా నిలిచింది. ‘పిల్లలు… దూరంగా ఉండండి. తల్లిదండ్రులు… మీ పిల్లలను దూరంగా ఉంచండి. తాతలు, బామ్మలు… మీ మనవళ్లను కూడా దూరంగా ఉంచండి. ముత్తాతలు… మీ సొంత రిస్క్‌పై చూడండి’ అంటూ సరదాగా ప్రారంభమైన ఈ వార్నింగ్ ప్రేక్షకుల్లో ఆసక్తిని పెంచింది. అనంతరం వచ్చిన బోల్డ్ విజువల్స్, స్టైలిష్ యాక్షన్ సన్నివేశాలు, డార్క్ టోన్ సినిమా మూడ్‌ను తెలియజేశాయి.

Yash Toxic Unveils Ladies & Ladies Promo

టీజర్‌లో యశ్ ఎంట్రీ మరో హైలైట్‌గా నిలిచింది. ‘లేడీస్ అండ్ లేడీస్… ఒక్కొక్కరుగా వస్తారా… ఒకేసారి వస్తారా?’ అంటూ యశ్ చెప్పిన డైలాగ్ అభిమానులను విపరీతంగా ఆకట్టుకుంటోంది. ఆ వెంటనే పలువురు మహిళా ఫైటర్లతో అతడు చేసే హై-ఆక్టేన్ యాక్షన్ సీక్వెన్స్ టీజర్‌కు ప్రత్యేక ఆకర్షణగా నిలిచింది. యశ్‌కు ప్రత్యేకమైన స్టైల్, మాస్ స్వాగ్, పవర్‌ఫుల్ స్క్రీన్ ప్రెజెన్స్ మరోసారి అభిమానులను అలరిస్తున్నాయి.

గీతూ మోహన్‌దాస్ దర్శకత్వంలో తెరకెక్కుతున్న ఈ చిత్రం సాధారణ కమర్షియల్ యాక్షన్ సినిమాల కంటే భిన్నమైన కాన్సెప్ట్‌తో రూపొందుతున్నట్లు ఈ ప్రమోషనల్ కంటెంట్ ద్వారా తెలుస్తోంది. డార్క్ వరల్డ్, ఎమోషనల్ డ్రామా, యాక్షన్, స్టైలిష్ విజువల్స్ కలగలిపి ఓ కొత్త అనుభూతిని అందించేలా సినిమాను తీర్చిదిద్దుతున్నట్లు చిత్ర బృందం చెబుతోంది.

కన్నడ, ఇంగ్లీష్ భాషల్లో రూపొందుతున్న ‘టాక్సిక్: ఎ ఫెయిరీటేల్ ఫర్ గ్రోన్-అప్స్’ చిత్రాన్ని తెలుగు, తమిళం, మలయాళం, హిందీ భాషల్లో డబ్ చేసి ప్రపంచవ్యాప్తంగా ఆగస్టు 26న విడుదల చేయనున్నారు.