Vijay Deverakonda: Ranabaali Promises a Grand Cinematic Experience

చరిత్ర పుటల్లో మరుగునపడిన వీరుల కథలు.. విదేశీ పాలకుల దురాగతాలు.. ఆత్మగౌరవం కోసం పోరాడిన మన పూర్వీకుల తెగువ.. భావితరాలకు తెలియాల్సిన ఎన్నో చారిత్రక వాస్తవాలు! వీటన్నింటినీ వెండితెరపై ఆవిష్కరించేందుకు సిద్ధమవుతోంది ‘రణబాలి’. కేవలం యాక్షన్‌, విజువల్స్‌తో ప్రేక్షకులను ఆకట్టుకోవడమే కాకుండా, మన చరిత్ర గురించి ఆలోచింపజేసేలా ఈ సినిమాను రూపొందించినట్లు హీరో విజయ్ దేవరకొండ చెబుతున్నారు. ప్రేక్షకులను ఒక కొత్త ప్రపంచంలోకి తీసుకెళ్లడంతో పాటు ఎమోషనల్‌గా కనెక్ట్ చేసే కథతో ఈ చిత్రం గ్రేట్ సినిమాటిక్ ఎక్స్‌పీరియన్స్ అందిస్తుందని విజయ్ అన్నారు.

విజయ్ దేవరకొండ హీరోగా, రష్మిక మందన్న హీరోయిన్‌గా నటిస్తున్న భారీ పాన్ ఇండియా చిత్రం ‘రణబాలి’. రాహుల్ సంకృత్యన్ ఈ సినిమాకు దర్శకత్వం వహిస్తున్నారు. టీ-సిరీస్ సమర్పణలో మైత్రీ మూవీ మేకర్స్ బ్యానర్‌పై నవీన్ యెర్నేని, వై. రవిశంకర్ భారీ బడ్జెట్‌తో నిర్మిస్తున్నారు. విజయదశమి సందర్భంగా అక్టోబర్ 16న ఈ చిత్రాన్ని ప్రపంచవ్యాప్తంగా గ్రాండ్‌గా విడుదల చేసేందుకు మేకర్స్ సిద్ధమవుతున్నారు. ఈ నేపథ్యంలో విజయ్ దేవరకొండ మీడియాతో ఇలా ముచ్చటించారు.

చరిత్రలో తెలియని అధ్యాయాలను తెరపైకి తీసుకొస్తున్నాం
‘రణబాలి’ని ఒక సాధారణ కమర్షియల్ సినిమాగా కాకుండా, ఒక ప్రత్యేకమైన ఉద్దేశంతో రూపొందించామని విజయ్ దేవరకొండ తెలిపారు. మన చరిత్రలో జరిగిన అన్యాయాలు, ప్రజలు ఎదుర్కొన్న దారుణమైన పరిస్థితులు, విదేశీ పాలకుల కాలంలో సామాన్యులు అనుభవించిన కష్టాలు తెలుసుకుంటే ఆశ్చర్యంతో పాటు ఆవేదన కూడా కలుగుతుందని చెప్పారు. కొన్ని చారిత్రక ఘటనల గురించి తెలుసుకున్నప్పుడు అవి నిజంగా జరిగాయా? అనేంతగా మనసు కలచివేస్తాయని పేర్కొన్నారు. చరిత్రలో ఎన్నో గొప్ప పోరాటాలు జరిగినప్పటికీ, వాటి వెనుక ఉన్న ప్రజల బాధలు, త్యాగాలు, పోరాట స్ఫూర్తి గురించి విస్తృతంగా చర్చ జరగాల్సిన అవసరం ఉందని ఆయన అభిప్రాయపడ్డారు. ఇలాంటి కథను నిజాయితీగా తెరకెక్కిస్తే భవిష్యత్తులో మరిన్ని చారిత్రక చిత్రాలు రూపొందేందుకు మార్గం ఏర్పడుతుందని, తెలియని చరిత్రను సినిమా మాధ్యమం ద్వారా ప్రజలకు చేరువ చేయాలన్నదే తమ ప్రయత్నమని వివరించారు.

బ్రిటీష్ పాలన వెనుక ఉన్న అసలు కథను తెలుసుకోవాలి
బ్రిటీష్ పాలన గురించి మాట్లాడిన విజయ్ దేవరకొండ.. వారు భారతదేశానికి వ్యాపారం కోసం వచ్చి, క్రమంగా రాజకీయ విభేదాలను తమకు అనుకూలంగా మార్చుకుని వివిధ రాజ్యాలపై ఆధిపత్యం సాధించారని పేర్కొన్నారు. రైల్వేల నిర్మాణం వంటి చారిత్రక అంశాలను కూడా ఆ కాలపు ఆర్థిక, రాజకీయ పరిస్థితుల నేపథ్యంలో పరిశీలించాల్సిన అవసరం ఉందన్నారు. భారతదేశంలోని సంపదను తరలించడానికి, వాణిజ్య ప్రయోజనాలను నెరవేర్చుకోవడానికి బ్రిటీష్ పాలకులు మౌలిక సదుపాయాలను ఉపయోగించుకున్నారని ఆయన అభిప్రాయపడ్డారు. కరువుల సమయంలో ప్రజలు ఎదుర్కొన్న ఆకలి, పన్నుల భారం, కఠినమైన శ్రమ వంటి అంశాలు చరిత్రలో మరింత విస్తృతంగా చర్చకు రావాలని చెప్పారు. చరిత్రను కేవలం యుద్ధాలు జరిగిన తేదీలు, రాజుల పేర్లకే పరిమితం చేయకూడదని, ఆయా ఘటనల వల్ల సామాన్య ప్రజల జీవితాలు ఎలా ప్రభావితమయ్యాయో కూడా తెలుసుకోవాలని విజయ్ అన్నారు. ఈ కోణాన్ని ప్రేక్షకుల ముందుకు తీసుకురావడంలో ‘రణబాలి’ కీలక ప్రయత్నంగా నిలుస్తుందని ఆయన ఆశాభావం వ్యక్తం చేశారు.

ఆకలి కేకల నుంచి ఆత్మగౌరవ పోరాటాల వరకు
గతంలో సంభవించిన కరువులు, ప్రజలు అనుభవించిన ఆకలి కష్టాల గురించి తనకు తెలిసిన కొన్ని విషయాలను విజయ్ ఇంటర్వ్యూలో ప్రస్తావించారు. ముఖ్యంగా బ్రిటీష్ పాలనలో కరువు బారినపడిన ప్రాంతాల్లో ప్రజలపై పన్నుల భారం, జీవన పరిస్థితులు ఎలా ప్రభావం చూపాయనే అంశాలు తనను కలచివేశాయని తెలిపారు.
ఆ సమయంలో ప్రజల పోరాటాలు కేవలం స్వాతంత్ర్యం అనే భావనతోనే సాగలేదని, తమ ప్రాంతాన్ని, ఆత్మగౌరవాన్ని, జీవన విధానాన్ని కాపాడుకోవాలనే తపన కూడా వాటి వెనుక ఉందని వివరించారు. తమ ఊళ్లలోకి వచ్చిన విదేశీయులు ఆధిపత్యం చెలాయించడం, స్థానిక ప్రజల జీవితాల్లో జోక్యం చేసుకోవడం వంటి పరిస్థితులకు వ్యతిరేకంగా ఎంతోమంది వీరులు పోరాడారని చెప్పారు. ఆ వీరుల కథలు జానపద గేయాల రూపంలో తరతరాలకు చేరాయని, ఆ తర్వాత కొందరు రచయితలు వాటిని పుస్తకాల రూపంలో భద్రపరిచారని తెలిపారు. అలాంటి మరుగునపడిన వీరుల పోరాట స్ఫూర్తే ‘రణబాలి’కి ప్రధాన ప్రేరణ అని విజయ్ వెల్లడించారు.

మన సంస్కృతి.. మన నమ్మకాలే మనల్ని నిలబెట్టాయి
ఎన్ని కష్టాలు ఎదురైనా భారతీయ సమాజాన్ని ఒక్కటిగా నిలబెట్టిన శక్తి మన సంస్కృతి, సంప్రదాయాలు, నమ్మకాలేనని విజయ్ దేవరకొండ అభిప్రాయపడ్డారు. కరువు వంటి విపత్కర పరిస్థితుల్లో గ్రామీణ ప్రజలు తమ ఆచారాలు, గ్రామదేవతల పూజలు, జాతరల ద్వారా ధైర్యాన్ని పొందేవారని గుర్తుచేశారు. మన పూర్వీకుల జీవన విధానం, గ్రామీణ సంస్కృతి, స్థానిక వీరుల పట్ల ప్రజలకు ఉన్న గౌరవం.. ఇవన్నీ ఈ కథలో కీలకమైన అంశాలని చెప్పారు. అప్పటి ప్రజల భావోద్వేగాలను, వారి జీవన పరిస్థితులను, పోరాటాల వెనుక ఉన్న కారణాలను ప్రేక్షకులు అర్థం చేసుకునేలా చిత్రాన్ని రూపొందించామని వివరించారు. మన సంస్కృతి కేవలం సంప్రదాయాల సమాహారం మాత్రమే కాదని, కష్టకాలంలో ప్రజలకు ధైర్యాన్ని ఇచ్చిన సామాజిక శక్తి కూడా అని ‘రణబాలి’ ద్వారా చెప్పే ప్రయత్నం చేశామని ఆయన తెలిపారు.

చరిత్రను మరిస్తే.. అదే తప్పులు మళ్లీ జరిగే ప్రమాదం
గతంలో భారతదేశంలోని వివిధ రాజ్యాల మధ్య ఉన్న విభేదాలను ఉపయోగించుకుని బ్రిటీష్ పాలకులు తమ ఆధిపత్యాన్ని పెంచుకున్నారని విజయ్ దేవరకొండ పేర్కొన్నారు. ఇందులో విదేశీ పాలకుల వ్యూహాలతో పాటు కొందరు స్వదేశీయుల స్వార్థం, దురాశ, కుట్రలు కూడా పాత్ర పోషించాయని చెప్పారు.
చరిత్రను చదివేటప్పుడు యుద్ధాల తేదీలు, రాజుల పేర్లు తెలుసుకోవడానికే పరిమితం కాకుండా, ఆ ఘటనలు ఎందుకు జరిగాయి? వాటి వల్ల ప్రజలు ఎలాంటి పరిస్థితులను ఎదుర్కొన్నారు? అనే ప్రశ్నలకు సమాధానాలు వెతకాలని అభిప్రాయపడ్డారు. గతంలో జరిగిన తప్పులను అర్థం చేసుకున్నప్పుడే భవిష్యత్తులో వాటిని పునరావృతం కాకుండా జాగ్రత్తపడగలమని అన్నారు. నేటికీ ప్రపంచంలోని వివిధ ప్రాంతాల్లో యుద్ధాలు జరుగుతున్నాయని, సమాజంలో కులం, మతం, ప్రాంతం పేరుతో విభజనలు కొనసాగుతున్నాయని గుర్తుచేశారు. గత చరిత్ర నుంచి పాఠాలు నేర్చుకుని సమాజంగా మరింత ఐక్యంగా ఉండాల్సిన అవసరాన్ని ‘రణబాలి’ ప్రేక్షకులకు గుర్తుచేస్తుందని తెలిపారు.

జానపదంతో మొదలై.. ఒక చారిత్రక ప్రపంచంలోకి తీసుకెళ్లే కథ
‘రణబాలి’ ప్రారంభం నుంచే ప్రేక్షకులను కథా ప్రపంచంలోకి తీసుకెళ్లేలా ఉంటుందని విజయ్ వెల్లడించారు. అనంతపురం ప్రాంతంలోని ఒక జాతరలో చిత్రీకరించిన జానపద వీడియోను దర్శకుడు రాహుల్ సంకృత్యన్ తనకు పంపించారని, అందులో చారిత్రక వీరుల గొప్పదనాన్ని జానపద గీతాల ద్వారా చెప్పిన తీరు తనను ఆకట్టుకుందని వివరించారు. అలాంటి జానపద నేపథ్యంతోనే సినిమా ప్రారంభమవుతుందని, అప్పటి గ్రామీణ వాతావరణం, ప్రజల జీవనశైలి, సంస్కృతి, వీరుల కథలను ప్రేక్షకులకు పరిచయం చేస్తుందని చెప్పారు. కేవలం ప్రచారంలో హైప్‌ సృష్టించడమే తమ ఉద్దేశం కాదని, సినిమా ట్రైలర్‌ను కూడా కథలోని అసలు భావాన్ని ప్రతిబింబించేలా రూపొందించామని పేర్కొన్నారు. థియేటర్‌లో సినిమా ప్రారంభమైన ఐదు నిమిషాల్లోనే ప్రేక్షకులు ఆ ప్రపంచంలోకి వెళ్లిపోతారని విజయ్ ధీమా వ్యక్తం చేశారు. వరుసగా యాక్షన్ సన్నివేశాలను చూపిస్తూ ముందుకు వెళ్లే కథ కాకుండా, పాత్రలు, భావోద్వేగాలు, సంఘటనలను సహజంగా ముడిపెడుతూ సాగే ప్రాపర్ స్టోరీ టెల్లింగ్ ఇందులో ఉంటుందని చెప్పారు.

యాక్షన్ కోసం యాక్షన్ కాదు.. కథకు అవసరమైనంతే
‘రణబాలి’లో యాక్షన్ సన్నివేశాలు ఆ కాలపు పరిస్థితులకు అనుగుణంగా రూపొందించినట్లు విజయ్ తెలిపారు. అప్పటి ఘర్షణలు, పోరాటాలు ఎంతో క్రూరంగా ఉండేవని, అయితే సినిమా కథకు అవసరమైన స్థాయిలోనే హింసను తెరపై చూపించామని చెప్పారు. ఆ కాలపు ప్రపంచాన్ని సున్నితంగా చూపించే కథ ఇది కాదని, అప్పటి మనుషుల స్వభావాలు, విభేదాలు, సంఘర్షణలు సహజంగానే కఠినంగా ఉండేవని వివరించారు. అందుకే యాక్షన్ సన్నివేశాలు కేవలం అభిమానులను అలరించేందుకు కాకుండా, కథలోని భావోద్వేగాలకు బలం చేకూర్చేలా రూపొందించామని చెప్పారు.
సుమారు 2 గంటల 50 నిమిషాల నిడివితో తెరకెక్కిన ఈ చిత్రంలో రియలిస్టిక్ అప్రోచ్ ప్రధాన ఆకర్షణగా నిలుస్తుందని విజయ్ అభిప్రాయపడ్డారు. ప్రతి సన్నివేశం కథలో భాగంగా ఉండేలా దర్శకుడు రాహుల్ ప్రత్యేక శ్రద్ధ తీసుకున్నారని తెలిపారు.

రణబాలి పాత్ర కోసం మూడు నెలల పాటు ప్రత్యేక సాధన
ఈ సినిమాలో విజయ్ దేవరకొండ కనిపించే తీరు, మాట్లాడే విధానం గత చిత్రాలకు భిన్నంగా ఉండనున్నాయి. రాయలసీమ నేపథ్యంలో సాగే కథ కావడంతో ఆ ప్రాంతపు యాసపై ఆయన ప్రత్యేకంగా దృష్టి పెట్టారు. పుట్టపర్తిలో పదేళ్లు చదువుకున్న అనుభవం తనకు కొంత ఉపయోగపడిందని, అయినప్పటికీ పాత్రకు అవసరమైన సహజత్వం కోసం రెండు నుంచి మూడు నెలల పాటు యాస, డైలాగ్స్‌పై సాధన చేశానని చెప్పారు.
రణబాలి పాత్రను ఎలా మాట్లాడించాలి? ఎలా నడిపించాలి? అతడి వ్యక్తిత్వాన్ని ఎలా ఆవిష్కరించాలి? అనే అంశాలపై దర్శకుడు రాహుల్ ఎంతో పరిశోధన చేశారని తెలిపారు. సాధారణంగా కొన్ని హీరో పాత్రలు తక్కువగా మాట్లాడుతుంటాయని, కానీ రణబాలి మాత్రం తన భావాలను గట్టిగా వ్యక్తం చేసే వ్యక్తి అని వివరించారు.
ఈ పాత్ర కోసం గుర్రపు స్వారీలోనూ శిక్షణ తీసుకున్నట్లు విజయ్ వెల్లడించారు. ప్రతి సినిమాలోనూ తన పాత్రను నిజ జీవితంలో తానే ఆ వ్యక్తిగా ఉన్నట్లు భావించి నటిస్తానని, ఆ అనుభవం తన వ్యక్తిత్వంపై కూడా ప్రభావం చూపుతుందని చెప్పారు. ‘రణబాలి’ తనలోనూ కొన్ని మార్పులు తీసుకొచ్చిన ప్రత్యేకమైన చిత్రమని పేర్కొన్నారు.

రష్మికతో ఈసారి మరింత బలమైన ఎమోషనల్ కనెక్షన్
‘రణబాలి’లో జయమ్మ పాత్రకు రష్మిక మందన్న సరైన ఎంపిక అని దర్శకుడు రాహుల్ సూచించారని విజయ్ తెలిపారు. గతంలో కొన్ని సినిమాల విషయంలో రష్మిక పేరు చర్చకు వచ్చినప్పటికీ, ఆ కథలకు ఆమె సరైన ఎంపిక కాదని భావించానని, అయితే ఈ సినిమాలో మాత్రం ఆమె పాత్రకు పూర్తి న్యాయం చేస్తుందని అనిపించిందని చెప్పారు. తామిద్దరం కలిసి చేసే సినిమా ప్రత్యేకంగా ఉండాలని కోరుకున్నానని, ‘రణబాలి’లో తమ పాత్రల మధ్య మంచి డ్రామా, ఎమోషన్ ఉన్నాయని వివరించారు. ఇద్దరి మధ్య ఉన్న నిజజీవిత పరిచయం, అనుబంధం పాత్రలకు మరింత భావోద్వేగ లోతును తీసుకొచ్చాయని అభిప్రాయపడ్డారు. సినిమా చూస్తున్న ప్రేక్షకులు కూడా ఆ అనుబంధాన్ని అనుభూతి చెందుతారని విజయ్ విశ్వాసం వ్యక్తం చేశారు. కథలోని భావోద్వేగాలకు రష్మిక పాత్ర కీలకంగా నిలుస్తుందని ఆయన మాటలను బట్టి అర్థమవుతోంది.

రాహుల్ సంకృత్యన్ విజన్‌.. ప్రతి పాత్రకు పర్ఫెక్ట్ కాస్టింగ్
‘రణబాలి’కి దర్శకుడు రాహుల్ సంకృత్యన్ హార్ట్ అండ్ సోల్ అని విజయ్ దేవరకొండ ప్రశంసించారు. తాను, నిర్మాతలు తమ అభిప్రాయాలను పంచుకున్నప్పటికీ, సినిమా రూపకల్పనలో రాహుల్ అన్నింటినీ దగ్గరుండి చూసుకున్నారని చెప్పారు. ప్రతి పాత్రకు సరైన నటీనటులను ఎంపిక చేయడంలో దర్శకుడు ప్రత్యేక శ్రద్ధ తీసుకున్నారని, ఆర్నాల్డ్ వోస్లూ కూడా మంచి నటన కనబరిచారని తెలిపారు. సినిమా కోసం అవసరమైన పరిశోధన, పాత్రల రూపకల్పన, కథ చెప్పే విధానంలో దర్శకుడి విజన్ స్పష్టంగా కనిపిస్తుందని అన్నారు. పెద్ద తెరపై ప్రేక్షకులకు ఒక ప్రత్యేకమైన అనుభూతిని అందించాలంటే కథలోని ప్రతి అంశం సమర్థంగా కుదరాలని, ఆ విషయంలో చిత్రబృందం ఎంతో జాగ్రత్తగా పనిచేసిందని విజయ్ పేర్కొన్నారు.

టికెట్ ధరల పెంపుపై విజయ్ సంచలన వ్యాఖ్యలు
సినిమా టికెట్ ధరల పెంపుపై తన అభిప్రాయాన్ని కూడా విజయ్ దేవరకొండ స్పష్టంగా వెల్లడించారు. కాలేజ్ రోజుల్లో టికెట్ ధరలు ఎక్కువగా ఉండటం వల్ల కొన్ని సినిమాలు చూడలేక బాధపడ్డానని గుర్తుచేసుకున్నారు. ఆ అనుభవం కారణంగానే హీరోగా తన సినిమాలకు టికెట్ ధరలు పెంచడం తనకు ఇష్టం ఉండదని చెప్పారు. ‘రణబాలి’తో పాటు తన రాబోయే సినిమాలకు కూడా టికెట్ ధరల పెంపు ఉండదని, రాజమౌళితో చేసే సినిమా విషయంలో మాత్రం మినహాయింపు ఉంటుందని సరదాగా వ్యాఖ్యానించారు. ప్రేక్షకులు తమ సినిమాలను సులభంగా చూసే అవకాశం ఉండాలనేదే తన అభిప్రాయమని ఆయన మాటలు స్పష్టం చేస్తున్నాయి.
అలాగే భవిష్యత్తులో రాయలసీమ యాసలో రాహుల్ సంకృత్యన్‌తో, గోదావరి జిల్లా నేపథ్యంతో రవికిరణ్ కోలాతో సినిమాలు చేయనున్నట్లు తెలిపారు. భక్తి ప్రధానమైన కథ లేదా బయోపిక్‌లో నటించే అవకాశం వచ్చినా తప్పకుండా పరిశీలిస్తానని చెప్పారు.

‘రణబాలి’ చూసి బయటకు వచ్చాక చరిత్ర గురించి మాట్లాడుకుంటారు
సినిమా విజయంపై తమకు పూర్తి నమ్మకం ఉందని విజయ్ దేవరకొండ తెలిపారు. అందుకే ప్రచార కార్యక్రమాలను కూడా కథలోని అసలు ప్రత్యేకతను ప్రేక్షకులకు పరిచయం చేసేలా నిర్వహిస్తున్నామని చెప్పారు. సినిమా చూసిన తర్వాత ప్రేక్షకులు కేవలం యాక్షన్ సన్నివేశాల గురించి మాత్రమే కాకుండా, మన చరిత్ర, సంస్కృతి, పూర్వీకుల పోరాటాల గురించి కూడా చర్చించుకుంటారని ఆశాభావం వ్యక్తం చేశారు. భారీ విజువల్స్, సహజమైన పాత్రలు, బలమైన భావోద్వేగాలు, రియలిస్టిక్ యాక్షన్‌తో పాటు ఒక ఉద్దేశం ఉన్న కథను ప్రేక్షకుల ముందుకు తీసుకొస్తున్నామని విజయ్ వెల్లడించారు.