మెగా ప్రిన్స్ వరుణ్ తేజ్ గాయపడ్డారు. ఆయన హీరోగా నటిస్తున్న ‘బరి’ షూటింగ్‌లో అనుకోని ప్రమాదం జరిగింది. వాలీబాల్ సీక్వెన్స్‌ల కోసం ప్రాక్టీస్ చేస్తున్న సమయంలో వరుణ్‌కు తీవ్రమైన మోకాలి (క్నీ) ఫ్రాక్చర్ అయింది. తక్షణమే అపోలో హాస్పిటల్‌లో వైద్య సహాయం అందించబడగా, వైద్యుల పర్యవేక్షణలో వరుణ్ తేజ్‌కు సర్జరీ నిర్వహించారు. ప్రస్తుతం ఆయన ఆరోగ్యం నిలకడగా ఉందని, శస్త్రచికిత్స విజయవంతంగా పూర్తయ్యిందని కుటుంబ సభ్యులు, సినీ వర్గాలు వెల్లడించాయి. డాక్టర్ల సూచన మేరకు కొంతకాలం పూర్తిగా విశ్రాంతి తీసుకోవాల్సి ఉండటంతో “బరి” సినిమా షూటింగ్‌కు తాత్కాలిక విరామం ఇవ్వబడింది. అభిమానులు ఆందోళన చెందాల్సిన అవసరం లేదని, త్వరలోనే వరుణ్ తేజ్ మళ్లీ కోలుకుని షూటింగ్‌లో పాల్గొంటారని చిత్ర యూనిట్ తెలిపింది. ఈ సందర్భంగా సినీ ప్రముఖులు, అభిమానులు వరుణ్ తేజ్ త్వరగా కోలుకోవాలని ఆకాంక్షిస్తూ సోషల్ మీడియాలో పోస్ట్ లు చేస్తున్నారు.
ఈ సందర్భంగా చిత్ర నిర్మాత, వరుణ్ తేజ్ సోదరి నిహారిక సోషల్ మీడియాలో పోస్ట్ చేస్తూ… ‘‘మా సోదరుడు వరుణ్ తేజ్ ‘బరి’ సినిమా కోసం వాలీబాల్ ప్రాక్టీస్ చేస్తుండగా మోకాలికి తీవ్ర గాయమైంది. ప్రస్తుతం ఆయనకు విజయవంతంగా శస్త్రచికిత్స నిర్వహించబడింది. ప్రస్తుతం వైద్యుల పర్యవేక్షణలో కోలుకుంటున్నారు. ఆయన ఆరోగ్యం స్థిరంగా ఉందని డాక్టర్లు తెలిపారు. త్వరలోనే పూర్తిస్థాయి ఆరోగ్యంతో తిరిగి కోలుకుని, మళ్లీ సాధారణ జీవితానికి రావాలని మేము ఆశిస్తున్నాం. ఈ సమయంలో ఆయనకు అందించిన ప్రేమ, శ్రద్ధ, మద్దతుకు మా హృదయపూర్వక కృతజ్ఞతలు” అని నిహారిక కొణిదెల పోస్ట్ చేశారు. యదు వంశీ దర్శకత్వంలో తెరకెక్కుతోన్న ఈ సినిమా ఇటీవల పూజా కార్యక్రమాలతో ప్రారంభం కాగా, పవన్ కళ్యాణ్ అతిథిగా హాజరై క్లాప్ కొట్టారు. విలేజ్‌ బ్యాక్‌డ్రాప్‌లో ఉండే స్పోర్ట్స్‌ డ్రామా ఇది. వాలీబాల్ బ్యాక్‌డ్రాప్‌లో తెరకెక్కనుంది. అనుదీప్ దేవ్ ఈ చిత్రానికి సంగీతం అందిస్తున్నాడు. సంక్రాంతికి ఈ సినిమా రిలీజ్ చేయాలని ప్లాన్ చేయగా, వరుణ్ గాయం కారణంగా షూటింగ్ ఆలస్యమయ్యే అవకాశం ఉంది.