MRP Movie Review: A Passable Comedy Thriller
చిత్రం: M₹P MRP :ఎంఆర్పీ ( నీకెంత నాకెంత)
రేటింగ్ : 2.75/5
నటీనటులు : నరేష్ అగస్త్య,కసిరెడ్డి రాజ్కుమార్, సుదర్శన్, డోనాల్ బిష్ట్, వెన్నెల కిశోర్, హర్ష వర్ధన్, చైతన్య జోన్నలగడ్డ, గగన్ విహారి, నందగోపాల్, స్నేహ సింగ్.. తదితరులు
బ్యానర్: పంచజన్య ఫీచర్స్
కథ, స్ర్కీన్ప్లే, దర్శకత్వం, నిర్మాత : శ్రవణ్ జేష్ట
సంగీత దర్శకుడు: అజయ్ అరసాడ
సినిమాటోగ్రాఫర్ (డీవోపీ): రాకేష్ కొలంచి
ఎడిటర్: మార్తాండ్ కె వెంకటేష్
విడుదల తేదీ: 17/07/2026
MRP Movie Review: A Passable Comedy Thriller
నరేష్ అగస్త్య,కసిరెడ్డి రాజ్కుమార్, సుదర్శన్ లీడ్ రోల్స్లో నీకెంత నాకెంత అనే ట్యాగ్ లైన్తో ప్రేక్షకుల ముందుకు ఈరోజు వచ్చిన ‘ఎంఆర్పీ’ సినిమా ఎలా ఉంది? కామెడీ, థ్రిల్లర్ అంశాలతో తెరకెక్కిన ఈ చిత్రం ప్రేక్షకులను ఎంతవరకు ఆకట్టుకుంది? కథ, కథనం, నటీనటుల పెర్ఫార్మెన్స్, సాంకేతిక విలువలు ఎలా ఉన్నాయి? ఈ సినిమా చూడదగ్గదేనా? తెలుసుకోవాలంటే ఈ రివ్యూను పూర్తిగా చదవండి.
కథ విషయానికొస్తే :
మనోహర్ (నరేష్ అగస్త్య), ధూళ్ల రవి (కసిరెడ్డి రాజ్కుమార్), పరమేశ్వరరావు (సుదర్శన్) చిన్నప్పటి నుంచి ప్రాణ స్నేహితులు. ఉద్యోగాల కోసం హైదరాబాద్కు వచ్చిన వీరు ఒకే గదిలో ఉంటూ జీవితంలో పెద్ద స్థాయికి చేరుకోవాలనే కలలు కంటుంటారు. ముఖ్యంగా మనోహర్ మాత్రం ఉద్యోగం కంటే సొంతంగా వ్యాపారం చేసి కోట్ల రూపాయలు సంపాదించాలనే ఆశతో ఉంటాడు. అయితే అతని ఆలోచనల వల్ల ఉద్యోగంలో ఇబ్బందులు ఎదురుకావడమే కాకుండా, ప్రేమించిన అమృత (డోనాల్ బిష్ట్)తోనూ విభేదాలు ఏర్పడతాయి. మరోవైపు పరమేశ్వరరావు, రవి కూడా తమ ఉద్యోగాలను కోల్పోవడంతో ముగ్గురూ కలిసి కొత్త వ్యాపారం ప్రారంభించాలని నిర్ణయిస్తారు. అయితే పెట్టుబడి కోసం కుటుంబ సభ్యులను ఆశ్రయించినా సహాయం దక్కదు. చివరకు రౌడీషీటర్ దైవాజీ (నంద గోపాల్) వద్ద నుంచి మ్యాగ్నెట్ (వెన్నెల కిషోర్) సాయంతో రూ.50 లక్షలు అప్పుగా తీసుకుని బిజినెస్ మొదలుపెడతారు. కానీ అనుకోని కారణాలతో వ్యాపారం దెబ్బతినడంతో అప్పు తీర్చే పరిస్థితి లేక దైవాజీని ఆశ్రయిస్తారు. అదే సమయంలో జరిగిన కొన్ని సంఘటనల కారణంగా దైవాజీ తండ్రి మరణించడంతో, పరిస్థితిని తమకు అనుకూలంగా మార్చుకుని అప్పు నుంచి బయటపడేందుకు అతని మృతదేహాన్ని కిడ్నాప్ చేయాలనే పథకం వేస్తారు. కానీ వారి ప్లాన్ అనూహ్యంగా తారుమారవుతుంది. దైవాజీ తండ్రి మృతదేహం బదులు మందాకిని అనే మహిళ మృతదేహం వారి చేతికి రావడంతో పరిస్థితి మరింత క్లిష్టంగా మారుతుంది. అసలు మందాకిని ఎవరు? దైవాజీ తండ్రి మృతదేహం ఏమైంది? దైవాజీ కుటుంబంలో ఉన్న విభేదాల వెనుక అసలు కారణం ఏమిటి? ముగ్గురు స్నేహితులు అప్పు నుంచి బయటపడగలిగారా? మనోహర్ ప్రేమకథకు ఎలాంటి ముగింపు లభించింది? ఈ వ్యవహారంలో పోలీసు అధికారి (హర్షవర్ధన్) పాత్ర ఏమిటి? వీరి వ్యాపారాన్ని నాశనం చేసింది ఎవరు? అనే ప్రశ్నలకు సమాధానమే ‘ఎంఆర్పీ’ సినిమా.
నటీనటుల పెర్ఫార్మెన్స్ గురించి..
సినిమాలో మనోహర్ పాత్రలో నరేష్ అగస్త్య తన పాత్ర పరిధిలో సహజమైన నటనతో ఆకట్టుకునే ప్రయత్నం చేశాడు. అయితే ఈ చిత్రానికి అసలు బలం సుదర్శన్, కసిరెడ్డి రాజ్కుమార్లే అని చెప్పాలి. తమ అద్భుతమైన కామిక్ టైమింగ్తో దాదాపు ప్రతి సన్నివేశంలో నవ్వులు పంచుతూ సినిమాను ఎంటర్టైనింగ్గా ముందుకు నడిపించారు. వీరిద్దరి కెమిస్ట్రీ సినిమాకు ప్రధాన హైలైట్గా నిలుస్తుంది. వెన్నెల కిశోర్ తనకు అలవాటైన స్టైల్లో హాస్యాన్ని పండించగా, హర్షవర్ధన్ కూడా తన ప్రత్యేక డైలాగ్ డెలివరీ, బాడీ లాంగ్వేజ్తో మంచి వినోదాన్ని అందించాడు. 30 ఇయర్స్ పృథ్వీ కనిపించేది కొద్దిసేపే అయినప్పటికీ, తన మార్క్ కామెడీతో గుర్తుండిపోయేలా చేశాడు. హీరోయిన్ డోనాల్ బిష్ట్కు పెద్దగా స్కోప్ లేకపోయినా, లవ్ సీన్స్, పాటల్లో తన పాత్రకు న్యాయం చేసింది. స్నేహ సింగ్ గ్లామర్తో పాటు తన పాత్రకు అవసరమైన నటనను కూడా కనబరిచింది. విలన్గా నంద గోపాల్ తన పాత్రలో ఒదిగిపోగా, చైతన్య జొన్నలగడ్డ, గగన్ విహారి తమ పాత్రల మేరకు మెప్పించారు. మిగిలిన నటీనటులు కూడా కథకు అవసరమైన మేరకు తమ పాత్రలను సమర్థంగా పోషించారు.
టెక్నీకల్ టీమ్ గురించి..
సాంకేతికంగా చూస్తే సినిమా మిశ్రమ ఫలితాన్ని ఇస్తుంది. సినిమాటోగ్రఫీ కథ మూడ్కు తగ్గట్టుగా ఉంది. కొన్ని ఫ్రేమ్స్, నైట్ సీన్స్ ఆకట్టుకున్నా, విజువల్గా ప్రత్యేకమైన అనుభూతిని మాత్రం కలిగించలేకపోయింది. బ్యాక్గ్రౌండ్ స్కోర్ సన్నివేశాల్లో ఉండాల్సిన ఉత్కంఠను, కామెడీని పూర్తి స్థాయిలో ఎలివేట్ చేయడంలో విఫలమైంది. పాటలు కూడా కథలో పెద్దగా ఇంపాక్ట్ చూపించవు. కొన్ని చోట్ల డబ్బింగ్ నాణ్యత సహజంగా అనిపించకపోవడం వల్ల సన్నివేశాల ఫీల్ దెబ్బతింటుంది. ఎడిటింగ్ పరంగా తొలి భాగంలో నిడివి ఎక్కువగా అనిపిస్తుంది. కొన్ని సన్నివేశాలను ట్రిమ్ చేసి ఉంటే కథ మరింత వేగంగా సాగేదనే భావన కలుగుతుంది. దర్శకుడు శవం చుట్టూ తిరిగే సస్పెన్స్ కామెడీ అనే పాత కాన్సెప్ట్ను తీసుకుని, దానికి తనదైన ట్రీట్మెంట్ ఇవ్వడానికి ప్రయత్నించినప్పటికీ, కథనం చాలా చోట్ల రొటీన్గా అనిపిస్తుంది. అయితే నిర్మాణ విలువల విషయంలో నిర్మాతలు రాజీ పడినట్లు ఎక్కడా కనిపించదు. సినిమా స్థాయికి తగ్గట్టుగా ప్రొడక్షన్ వాల్యూస్ బాగుండి, తెరపై మంచి రిచ్నెస్ కనిపిస్తుంది.
సినిమా ఎలా ఉందంటే..
ముగ్గురు ప్రధాన పాత్రలైన మనోహర్, రవి, పరమేశ్వరరావు పేర్లలోని మొదటి అక్షరాలతో ‘ఎంఆర్పీ’ అనే టైటిల్ పెట్టడం ఆసక్తికరంగా అనిపిస్తుంది. ముగ్గురు స్నేహితులు అనుకోకుండా ఓ పెద్ద సమస్యలో చిక్కుకుని, దాని నుంచి బయటపడేందుకు చేసే ప్రయత్నాలను కామెడీ, సస్పెన్స్ ఎలిమెంట్స్తో తెలుగులో ఇప్పటికే చాలానే సినిమాలు వచ్చాయి. ‘ఎంఆర్పీ’ కూడా అదే తరహా జోనర్లో నడిచే సినిమా. అయితే దర్శకుడు కథలో కొన్ని ట్విస్టులు జోడించి ప్రేక్షకులను ఎంటర్టైన్ చేయాలని ప్రయత్నించాడు. సినిమా ప్రారంభం మాత్రం ఆశించినంత వేగంగా సాగదు. ముగ్గురు హీరోల పాత్రల పరిచయం, వారి వ్యక్తిగత జీవితాలు, మనోహర్ బిజినెస్ కలలు, హీరోయిన్తో లవ్ ట్రాక్, పాటలు… ఇలా మొదటి భాగంలో చాలా సన్నివేశాలు అవసరానికి మించి సాగిన భావన కలుగుతుంది. దీంతో ఫస్ట్ హాఫ్లో కథ ముందుకు కదులుతున్న ఫీలింగ్ కంటే, కథను సెట్ చేయడానికే ఎక్కువ సమయం తీసుకున్నట్లు అనిపిస్తుంది. కామెడీ కూడా మొదట్లో పెద్దగా వర్కౌట్ కాదు. అయితే వెన్నెల కిశోర్ ఎంట్రీ తర్వాత సినిమా కాస్త ట్రాక్లో పడుతుంది. దైవాజీ తండ్రి మరణించడం, అతని మృతదేహాన్ని కిడ్నాప్ చేయాలనే ప్లాన్, కానీ పొరపాటున మరో మహిళ మృతదేహం చేతికి రావడం వంటి పరిణామాలతో కథ ఒక్కసారిగా ఆసక్తికరంగా మారుతుంది. ప్రీ -ఇంటర్వెల్ నుంచి సస్పెన్స్ పెరగడంతో రెండో భాగంపై ఆసక్తి ఏర్పడుతుంది. సెకండ్ హాఫ్ ఈ సినిమాకు ప్రధాన బలం. దైవాజీ తండ్రి మృతదేహం కోసం ముగ్గురు స్నేహితులు, దైవాజీ, భాను, మ్యాగ్నెట్, పోలీసులు ఇలా అందరూ చేసే వెతుకులాట కథను ఎంగేజింగ్గా మార్చుతుంది. శవం ఒకరి దగ్గర నుంచి మరొకరి దగ్గరకు మారుతూ సాగే ఎపిసోడ్లు సస్పెన్స్తో పాటు వినోదాన్ని కూడా అందిస్తాయి. ముఖ్యంగా సుదర్శన్, కసిరెడ్డి రాజ్కుమార్ పోలీసులతో కలిసి చేసే కామెడీ ట్రాక్ బాగా నవ్విస్తుంది. ఈ ఇద్దరి టైమింగ్ చాలా చోట్ల సినిమాను నిలబెట్టింది. అయితే ఇదే కాన్సెప్ట్ను కొంతసేపటి తర్వాత మరీ ఎక్కువగా సాగదీయడం వల్ల కథలో రిపిటేషన్ కనిపిస్తుంది. ఒకే అంశం చుట్టూ తిరిగే సన్నివేశాలు కొన్నిచోట్ల నిడివిని పెంచిన భావన కలిగిస్తాయి. మందాకిని పాత్రకు సంబంధించిన ఫ్లాష్బ్యాక్ కథకు కొంత ఎమోషనల్ టచ్ ఇస్తుంది. క్లైమాక్స్లో మృతదేహం మళ్లీ ముగ్గురు స్నేహితుల దగ్గరకు రావడం, అక్కడి నుంచి కథను ముగించిన విధానం ఆసక్తికరంగా ఉంటుంది.
ప్లస్ పాయింట్స్ :
సుదర్శన్, కసిరెడ్డి రాజ్కుమార్ కామెడీ టైమింగ్
సెకండ్ హాఫ్లో వచ్చే సస్పెన్స్-కామెడీ ఎపిసోడ్స్
వెన్నెల కిశోర్, హర్షవర్ధన్ కామెడీ
ప్రీ- ఇంటర్వెల్ ట్విస్ట్
నిర్మాణ విలువలు
మైనస్ పాయింట్స్ :
చాలా నెమ్మదిగా సాగే ఫస్ట్ హాఫ్
రొటీన్ స్టోరీ, ప్రిడిక్టబుల్ ట్రీట్మెంట్
ఆకట్టుకోని పాటలు, బ్యాక్గ్రౌండ్ స్కోర్
సాగదీసిన కొన్ని సన్నివేశాలు, ల్యాగ్
ఫైనల్గా చెప్పాలంటే..
రొటీన్ కామెడీ- సస్పెన్స్ ఫార్ములాలో తెరకెక్కిన ఈ చిత్రం మొదటి భాగంలో నెమ్మదిగా సాగినా, రెండో భాగంలో కామెడీ, ట్విస్టులతో కొంతవరకు ఎంటర్టైన్ చేస్తుంది. లాజిక్స్ను పక్కనపెట్టి, టైమ్పాస్ కోసం ఓ లైట్ హార్ట్డ్ కామెడీ థ్రిల్లర్ చూడాలనుకునే వారికి ఈ సినిమా ఒకసారి చూడదగ్గ అనుభూతిని ఇస్తుంది. అయితే కొత్తదనం లేదా బలమైన కథనం ఆశించే ప్రేక్షకులకు మాత్రం ఇది పూర్తిస్థాయిలో సంతృప్తినివ్వకపోవచ్చు.
About the Author
