Varun Tej full confidence in Korean Kanakaraju
మెగా ప్రిన్స్ వరుణ్ తేజ్ హీరోగా మేర్లపాక గాంధీ దర్శకత్వంలో తెరకెక్కిన హారర్ కామెడీ ఎంటర్టైనర్ ‘కొరియన్ కనకరాజు’ ఆగస్టు 7న ప్రపంచవ్యాప్తంగా గ్రాండ్గా విడుదల కానుంది. యూవీ క్రియేషన్స్, ఫస్ట్ ఫ్రేమ్ ఎంటర్టైన్మెంట్ సంయుక్తంగా నిర్మించిన ఈ చిత్రంపై ఇప్పటికే విడుదలైన గ్లింప్స్, టీజర్, ట్రైలర్, రెండు పాటలు ప్రేక్షకుల్లో మంచి అంచనాలను పెంచాయి. విడుదలకు ముందు భీమవరంలో నిర్వహించిన గ్రాండ్ ప్రీ రిలీజ్ ఈవెంట్కు అభిమానులు భారీ సంఖ్యలో హాజరై చిత్రబృందానికి ఘన స్వాగతం పలికారు.
Varun Tej full confidence in Korean Kanakaraju
ఈ సందర్భంగా మాట్లాడిన వరుణ్ తేజ్, సినిమా విజయంపై పూర్తి నమ్మకాన్ని వ్యక్తం చేశారు. “ఆగస్టు 7న ‘కొరియన్ కనకరాజు’తో ప్రేక్షకులకు నాన్స్టాప్ ఎంటర్టైన్మెంట్ అందించబోతున్నాం. ప్రతి ఒక్కరూ కుటుంబంతో కలిసి థియేటర్లో చూసి ఎంజాయ్ చేసే సినిమా ఇది. మా చిత్రంపై ఉన్న నమ్మకంతోనే విడుదలకు ఒక రోజు ముందుగా, ఆగస్టు 6 రాత్రి నుంచే ఆంధ్రప్రదేశ్, తెలంగాణలో ప్రత్యేక ప్రీమియర్ షోలు వేస్తున్నాం. సినిమా తప్పకుండా మీ అందరికీ నచ్చుతుంది” అని అన్నారు.
భీమవరంతో తనకున్న అనుబంధాన్ని గుర్తు చేసుకున్న వరుణ్ తేజ్, 2018లో ‘తొలిప్రేమ’ ఈవెంట్ కోసం ఇక్కడికి వచ్చానని, ఆ సినిమా తన కెరీర్లో ప్రత్యేక విజయాన్ని అందించిందని చెప్పారు. ఇప్పుడు ‘కొరియన్ కనకరాజు’ ఈవెంట్ కూడా అదే ఉత్సాహంతో జరగడం చూస్తుంటే మరోసారి ఆ మ్యాజిక్ రిపీట్ అవుతుందనే నమ్మకం కలుగుతోందన్నారు. దర్శకుడు మేర్లపాక గాంధీపై ప్రశంసలు కురిపించిన వరుణ్, అద్భుతమైన కామెడీ టైమింగ్ ఉన్న దర్శకుడిగా ఆయన మరో భారీ విజయాన్ని అందుకుంటారని అన్నారు. అలాగే సంగీత దర్శకుడు ఎస్. థమన్ గురించి మాట్లాడుతూ, ఈ చిత్రానికి ఆయన సంగీతం, ముఖ్యంగా రీ-రికార్డింగ్ సినిమాకు ప్రాణం పోసిందని కొనియాడారు. హీరోయిన్ రితిక నాయక్, నటుడు సత్య , అలాగే చిత్ర సాంకేతిక బృందం అందరికీ ప్రత్యేకంగా కృతజ్ఞతలు తెలిపారు. మెగా అభిమానులను ఉద్దేశించి మాట్లాడుతూ, “మీరు గర్వపడే సినిమా ఇది. మా టీమ్ ఎంతో ప్రేమతో, నమ్మకంతో రూపొందించిన ఈ చిత్రాన్ని ప్రేక్షకులు ఆదరిస్తారనే విశ్వాసం ఉంది. ‘ఓజీ’, ‘పెద్ది’ వంటి విజయాలతో మెగా కుటుంబానికి మంచి ఊపు వచ్చింది. నా స్థాయిలో ఆ విజయ పరంపరను కొనసాగించేందుకు ప్రయత్నిస్తున్నాను” అని పేర్కొన్నారు.
హీరోయిన్ రితిక నాయక్ మాట్లాడుతూ, ఈ చిత్రంలో తాను పోషించిన ‘చైత్ర’ పాత్ర తన కెరీర్లో ప్రత్యేకంగా నిలిచిపోతుందని చెప్పారు. దర్శకుడు మేర్లపాక గాంధీ నుంచి ఎంతో నేర్చుకున్నానని, వరుణ్ తేజ్తో కలిసి పనిచేయడం గొప్ప అనుభవమని పేర్కొన్నారు. నిర్మాతలు ఎక్కడా రాజీ పడకుండా సినిమాను నిర్మించారని, ఆగస్టు 7న ప్రేక్షకులు థియేటర్లలో సినిమాను ఆదరించాలని కోరారు.
సంగీత దర్శకుడు ఎస్. థమన్ మాట్లాడుతూ, భీమవరం తనకు ఎప్పుడూ ప్రత్యేకమేనని, ‘తొలిప్రేమ’ తర్వాత మళ్లీ ఇక్కడికి రావడం ఆనందంగా ఉందన్నారు. ‘కొరియన్ కనకరాజు’ ఒక ప్రత్యేకమైన సినిమా అని, దర్శకుడు గాంధీ దాన్ని అద్భుతంగా తెరకెక్కించారని తెలిపారు. తాను ఇప్పటికే సినిమా చూశానని, ప్రేక్షకులను పూర్తి స్థాయిలో అలరిస్తుందని విశ్వాసం వ్యక్తం చేశారు.
భారీ అభిమానుల సందడి మధ్య జరిగిన ఈ ప్రీ రిలీజ్ ఈవెంట్లో చిత్ర యూనిట్ సభ్యులంతా పాల్గొని, ఆగస్టు 7న థియేటర్లలో ‘కొరియన్ కనకరాజు’ను చూసి ఆదరించాలని ప్రేక్షకులను కోరారు.
About the Author
