Sharwa Bhogi Action Climax Shoot

శర్వానంద్ హీరోగా దర్శకుడు సంపత్ నంది తెరకెక్కిస్తున్న పీరియాడికల్ యాక్షన్ డ్రామా ‘భోగి’ ప్రస్తుతం షూటింగ్ చివరి దశకు చేరుకుంది. ఈ చిత్రానికి సంబంధించిన కీలకమైన క్లైమాక్స్ సన్నివేశాల చిత్రీకరణ ప్రస్తుతం శరవేగంగా కొనసాగుతోంది. ప్రేక్షకులకు మరపురాని థియేట్రికల్ అనుభూతిని అందించేలా ఈ క్లైమాక్స్‌ను అత్యంత భారీ స్థాయిలో రూపొందిస్తున్నట్లు చిత్రబృందం వెల్లడించింది.

ప్రత్యేకంగా ఈ క్లైమాక్స్ కోసం ఆర్ట్ డైరెక్టర్ కిరణ్ కుమార్ మన్నె రూపొందించిన భారీ సెట్‌లో హై-ఆక్టేన్ ఎమోషనల్ యాక్షన్ ఎపిసోడ్‌ను చిత్రీకరిస్తున్నారు. ప్రముఖ స్టంట్ కొరియోగ్రాఫర్ దిలీప్ సుబ్బరాయన్ ఆధ్వర్యంలో రూపొందుతున్న ఈ యాక్షన్ సన్నివేశాలు సినిమాకు ప్రధాన ఆకర్షణగా నిలవనున్నాయి. మేకర్స్ వెల్లడించిన వివరాల ప్రకారం, ఈ క్లైమాక్స్‌లో శర్వానంద్ ఇప్పటివరకు చేయని స్థాయిలో అత్యంత ఇంటెన్స్, రిస్కీ స్టంట్స్ చేయబోతున్నారు. భావోద్వేగాలతో కూడిన యాక్షన్ సన్నివేశాల్లో ఆయన నటనలో కొత్త కోణాన్ని ప్రేక్షకులు చూడబోతున్నారని చెబుతున్నారు. దాదాపు 20 రోజుల పాటు కొనసాగే ఈ భారీ షెడ్యూల్‌తో చిత్రీకరణలో కీలక భాగం పూర్తికానుంది.

Sharwa Bhogi Action Climax Shoot

1960ల కాలం నాటి తెలంగాణ–మహారాష్ట్ర సరిహద్దు ప్రాంతాల నేపథ్యంలో సాగే ‘భోగి’, యాక్షన్ మరియు ఎమోషన్‌ల సమ్మేళనంగా రూపొందుతున్న పీరియడ్ డ్రామా. కథా నేపథ్యం, పాత్రల రూపకల్పన, సాంకేతిక విలువలు ఈ చిత్రాన్ని ప్రత్యేకంగా నిలబెడతాయని యూనిట్ నమ్మకం వ్యక్తం చేస్తోంది.

ఈ చిత్రంలో శర్వానంద్ సరసన అనుపమ పరమేశ్వరన్, డింపుల్ హయతి కథానాయికలుగా నటిస్తున్నారు. శ్రీ సత్యసాయి ఆర్ట్స్ బ్యానర్‌పై కె.కె. రాధామోహన్ ఈ చిత్రాన్ని నిర్మిస్తున్నారు. సంగీత దర్శకుడు భీమ్స్ సిసిరోలియో స్వరాలు సమకూరుస్తున్నారు.

పాన్ ఇండియా స్థాయిలో రూపొందుతున్న ఈ చిత్రం రక్షా బంధన్ సందర్భంగా ఆగస్టు 28న ప్రపంచవ్యాప్తంగా ప్రేక్షకుల ముందుకు రానుంది. ఇప్పటికే విడుదలైన ప్రధాన పాత్రల ఫస్ట్ లుక్ పోస్టర్లు మంచి స్పందనను అందుకుని, సినిమాపై అంచనాలను మరింత పెంచాయి. భారీ యాక్షన్, బలమైన భావోద్వేగాలు, పీరియడ్ బ్యాక్‌డ్రాప్‌తో ‘భోగి’ ఈ ఏడాది ఆసక్తికర చిత్రాల్లో ఒకటిగా నిలవనుందనే అభిప్రాయం సినీ వర్గాల్లో వ్యక్తమవుతోంది.