Ramayana Trailer Review: A Stunning Visuals

‘రామాయణ’ ట్రైలర్ రివ్యూ :
భారతీయ సినిమా చరిత్రలో మరో విజువల్ యుగానికి శ్రీకారం…
రాముడి ప్రశాంతత, రావణుడి రౌద్రం హైలైట్!

ఎన్నో సంవత్సరాలుగా భారతీయ ప్రేక్షకులు ఎదురుచూస్తున్న ‘రామాయణ’ సినిమా ట్రైలర్ ఎట్టకేలకు విడుదలైంది. దర్శకుడు నితేష్ తివారీ, నిర్మాత నమిత్ మల్హోత్రా కలిసి అత్యంత ప్రతిష్టాత్మకంగా రూపొందిస్తున్న ఈ మైథాలజికల్ విజువల్ ఎపిక్‌కు ట్రైలర్ భారీ అంచనాలను మరింత పెంచింది. రణ్‌బీర్ కపూర్ రాముడిగా, యశ్ రావణుడిగా, సాయి పల్లవి సీతగా, సన్నీ డియోల్ హనుమంతుడిగా కనిపించిన ఈ ట్రైలర్ మొదటి ఫ్రేమ్ నుంచే గ్రాండియర్‌‌గా సాగింది. ప్రారంభమైన క్షణం నుంచే ఇది సాధారణ పౌరాణిక సినిమా కాదని అర్థమవుతుంది. ప్రతి ఫ్రేమ్ హాలీవుడ్ స్థాయి విజువల్ ట్రీట్‌ను గుర్తు చేస్తుంది. అడవులు, అయోధ్య, లంక రాజ్యం, యుద్ధ సన్నివేశాలు, ఆకాశంలో ఎగిరే దృశ్యాలు అన్నీ అత్యున్నత సాంకేతిక ప్రమాణాలతో రూపొందించినట్టు కనిపిస్తున్నాయి. రాముడి పాత్రలో రణ్‌బీర్ కపూర్ పూర్తిగా ఒదిగిపోయారు. అతని కళ్లలో ప్రశాంతత, ముఖంలో కరుణ, నడకలో రాజసం స్పష్టంగా కనిపిస్తున్నాయి. యుద్ధానికి సిద్ధమయ్యే సందర్భాల్లో కూడా అతని పాత్రలో ధర్మం, సంయమనం ప్రధానంగా చూపించడం ఆకట్టుకుంటుంది. రావణుడిగా యశ్ ఎంట్రీ పవర్‌‌ఫుల్ ఇంపాక్ట్ ఇచ్చింది. రావణుడి పాత్రను కేవలం ప్రతినాయకుడిగా కాకుండా మహా శక్తివంతమైన చక్రవర్తిగా చూపించే ప్రయత్నం కనిపిస్తోంది. అతని స్క్రీన్ ప్రెజెన్స్, బాడీ లాంగ్వేజ్, కాస్ట్యూమ్స్, డైలాగ్ డెలివరీ అన్నీ పాత్రకు భారీ స్థాయిని తీసుకొచ్చాయి. ట్రైలర్ ముగిసే సమయానికి రామ-రావణుల మధ్య జరిగే మహాయుద్ధంపై ఆసక్తి మరింత పెరుగుతుంది. ఇక సీత పాత్రలో సాయి పల్లవి చాలా సహజంగా కనిపించింది. ఆమె లుక్స్, భావోద్వేగాలు, ప్రశాంతమైన అభినయం పాత్రకు తగిన గౌరవాన్ని తీసుకొచ్చాయి. ట్రైలర్‌లో ఆమెకు ఎక్కువ స్క్రీన్ టైమ్ లేకపోయినా, కనిపించిన ప్రతి ఫ్రేమ్ గుర్తుండిపోయేలా ఉంది. అలాగే ట్రైలర్ చివర్లో కనిపించిన హనుమంతుడి రూపం అభిమానులను ఆకట్టుకుంటుంది. సన్నీ డియోల్‌కు తగిన గంభీరత, శక్తి, భక్తి ఈ పాత్రలో కనిపిస్తున్నాయి. పూర్తి సినిమాలో ఆయన పాత్రకు మరింత ప్రాధాన్యం ఉండే సూచనలు ట్రైలర్ ఇస్తోంది.

Ramayana Trailer Review: A Stunning Visuals

ఈ ట్రైలర్‌లో వీఎఫ్‌ఎక్స్‌ ప్రధాన ఆకర్షణగా నిలిచింది. గతంలో విడుదలైన ఫస్ట్ లుక్‌పై వచ్చిన విమర్శలను దృష్టిలో పెట్టుకున్న మేకర్స్, ఈసారి అత్యున్నత నాణ్యతను అందించే ప్రయత్నం చేసినట్టు తెలుస్తోంది. ప్రతి సీజీ షాట్ సహజంగా కనిపించడం విశేషం. ఐమాక్స్ ఫార్మాట్‌లో ఈ సినిమా ఎందుకు రూపొందించారో ట్రైలర్ చూస్తే అర్థమవుతుంది. మరోవైపు ట్రైలర్‌కు మరో ప్రధాన బలం బ్యాక్‌గ్రౌండ్ స్కోర్. ఆస్కార్ విజేత ఏ.ఆర్.రెహమాన్, హన్స్ జిమ్మర్, కలయిక ట్రైలర్‌కు అద్భుతమైన ఎలివేషన్ ఇచ్చింది. ప్రతి కీలక సన్నివేశంలో సంగీతం భావోద్వేగాన్ని మరింత పెంచింది. ట్రైలర్‌తోనే మేకర్స్ భారీ అంచనాలు పెంచారు. ఇప్పుడు అందరి దృష్టి దీపావళి 2026న విడుదలయ్యే ‘రామాయణం: పార్ట్ 1’పైనే ఉంది.