Allu Arjun’s ‘Raaka’ Guinness World Record

ఒక సినిమా విడుదలకు ముందే ఎంతటి సంచలనం సృష్టించగలదో అల్లు అర్జున్‌ ‘రాకా’ మరోసారి నిరూపించింది. అనౌన్స్‌మెంట్‌ నుంచి ప్రతి అప్‌డేట్‌ వరకు భారీ అంచనాలు పెంచుకుంటూ వస్తున్న ఈ చిత్రం ఇప్పుడు ఏకంగా గిన్నిస్ వరల్డ్ రికార్డ్‌లో చోటు దక్కించుకుంది. సాధారణంగా సినిమాల రికార్డులు బాక్సాఫీస్ దగ్గర నమోదవుతుంటాయి. కానీ ‘రాకా’ మాత్రం సినిమా విడుదలకు ముందే అత్యాధునిక సాంకేతికతతో ప్రపంచ రికార్డును తన ఖాతాలో వేసుకుంది.

‘మోస్ట్ పీపుల్ మోషన్-క్యాప్చర్డ్ ఇన్ రియల్-టైమ్’ విభాగంలో ఈ ఘనతను సాధించింది. ఒకేసారి 37 మంది కళాకారుల పెర్ఫార్మెన్స్‌ను రియల్ టైమ్‌లో మోషన్ క్యాప్చర్ చేయడం ద్వారా ఈ రికార్డును సొంతం చేసుకుంది. 2026 ఫిబ్రవరిలో జరిగిన ఈ ప్రత్యేక ప్రక్రియకు సెప్టెంబర్ 15న అధికారిక గుర్తింపు లభించింది.

ఈ అరుదైన ఘనతను కేవలం ‘37 మంది’ అనే సంఖ్యతో చెప్పడం సరిపోదు. ఎందుకంటే ఈ మొత్తం ప్రక్రియ వెనుక భారీ స్థాయి సాంకేతిక వ్యవస్థ పనిచేసింది. ఏకంగా 92 ఆప్టికల్ మోషన్ క్యాప్చర్ కెమెరాలను ఉపయోగించి 37 మంది పెర్ఫార్మర్ల కదలికలు, హావభావాలను ఒకేసారి క్యాప్చర్ చేశారు. 4 ఏళ్ల చిన్నారి నుంచి 70 ఏళ్ల వ్యక్తి వరకు విభిన్న వయసులకు చెందిన కళాకారులు ఈ ప్రక్రియలో భాగమయ్యారు.

ఒకే క్యాప్చర్ వాల్యూమ్‌లో ఇంతమంది వ్యక్తుల కదలికలను ఏకకాలంలో కచ్చితంగా రికార్డ్ చేయడం అంత సులభమైన విషయం కాదు. ప్రతి ఒక్కరి పెర్ఫార్మెన్స్‌లోని సహజత్వాన్ని కాపాడుతూ, సమన్వయంతో మొత్తం డేటాను క్యాప్చర్ చేయడం ఈ రికార్డ్ ప్రయత్నంలో ప్రధాన సవాలుగా నిలిచింది. క్యాప్చర్, కాలిబ్రేషన్, నెట్‌వర్కింగ్, సింక్రనైజేషన్, రియల్ టైమ్ అన్‌రియల్ విజువలైజేషన్, ఫేషియల్ క్యాప్చర్ వంటి అనేక సాంకేతిక అంశాలను సమన్వయం చేస్తూ ఈ ప్రక్రియను పూర్తి చేశారు.

అవతార్‌, అవెంజర్స్ స్థాయి టెక్నాలజీ.. ఇప్పుడు ‘రాకా’లో
మోషన్ క్యాప్చర్ టెక్నాలజీ అనగానే ప్రపంచవ్యాప్తంగా గుర్తుకొచ్చే హాలీవుడ్ భారీ చిత్రాల్లో Avatar, Avengers వంటి సినిమాలు ఉన్నాయి. అదే తరహా అత్యాధునిక టెక్నాలజీని ‘రాకా’లో విస్తృత స్థాయిలో వినియోగిస్తున్నారు. ఈ గిన్నిస్ రికార్డ్ ప్రయత్నం ద్వారా భారతీయ సినిమా కూడా ఇలాంటి టెక్నాలజీని భారీ స్థాయిలో ఉపయోగించగల సామర్థ్యాన్ని ప్రదర్శించింది.

చిత్ర వీఎఫ్‌ఎక్స్ విభాగం, యాపిల్ ఆర్ట్ స్టూడియో సాంకేతిక నైపుణ్యం, ప్రత్యేకంగా రూపొందించిన మోషన్ క్యాప్చర్ పైప్‌లైన్, అత్యాధునిక వర్క్‌ఫ్లోతో ఈ రికార్డ్ సాధ్యమైంది. దర్శకుడు అట్లీ విజన్‌కు తగ్గట్టుగా భారీ సాంకేతిక పరిజ్ఞానాన్ని తెరపైకి తీసుకురావడంలో చిత్రబృందం సమిష్టి కృషి కీలకంగా నిలిచింది.

దర్శకుడు అట్లీ పుట్టినరోజు సందర్భంగా ఈ గిన్నిస్ రికార్డ్ వివరాలను అధికారికంగా వెల్లడించడం కూడా ప్రత్యేక ఆకర్షణగా మారింది. గిన్నిస్ వరల్డ్ రికార్డ్స్ సీనియర్ అడ్జుడికేటర్ స్వప్నిల్ డాంగ్రికర్ అధికారిక సర్టిఫికెట్‌ను అల్లు అర్జున్, అట్లీకి అందించారు.

మూడు కాలాలు.. ఒక భారీ సైన్స్ ఫిక్షన్ ప్రపంచం
‘రాకా’ కేవలం టెక్నాలజీ ఆధారంగా రూపొందుతున్న సినిమా మాత్రమే కాదు. మూడు విభిన్న కాలాల నేపథ్యంలో తెరకెక్కుతున్న సైన్స్ ఫిక్షన్ థ్రిల్లర్‌గా ఈ చిత్రాన్ని భారీ స్థాయిలో రూపొందిస్తున్నారు. అల్లు అర్జున్‌కు జోడీగా దీపికా పదుకొణె నటిస్తుండగా.. జాన్వీకపూర్, రష్మిక మందన్న, మృణాల్ ఠాకూర్ కీలక పాత్రల్లో కనిపించనున్నారు. సాయి అభ్యంకర్ సంగీతం అందిస్తున్నారు.

సన్ పిక్చర్స్ నిర్మిస్తున్న ఈ చిత్రంపై ఇప్పటికే భారీ అంచనాలు ఉన్నాయి. ఇప్పుడు గిన్నిస్ వరల్డ్ రికార్డ్ కూడా ఖాతాలో చేరడంతో ‘రాకా’పై ఆసక్తి మరింత పెరిగింది. సినిమా కథలో ఎలాంటి ప్రపంచాన్ని చూపించబోతున్నారన్నది ఒక ప్రశ్న అయితే.. దాన్ని తెరపైకి తీసుకురావడానికి ఎలాంటి టెక్నాలజీని ఉపయోగిస్తున్నారన్నది మరో ఆసక్తికరమైన అంశంగా మారింది. విడుదలకు ముందే ప్రపంచ రికార్డును సొంతం చేసుకున్న ‘రాకా’.. భారతీయ సినిమా సాంకేతిక పరిజ్ఞానానికి మరో మైలురాయిగా నిలిచింది.