‘బాణం’ చిత్రంతో హీరోగా ఎంట్రీ ఇచ్చి పదిహేడేళ్ల కెరీర్‌‌లో ఇరవై రెండు సినిమాల్లో నటించారు నారా రోహిత్. డిఫరెంట్ కాన్సెప్టులను సెలెక్ట్ చేసుకుంటూ తనకంటూ ఓ అనే ప్రత్యేకమైన ఇమేజ్‌ను క్రియేట్ చేసుకున్నారు. ఆయన ఎంపికచేసుకునే కథతోపాటు టైటిల్స్ విషయంలోనూ కొత్తదనం ఉండేలా చూసుకుంటారు. గతేడాది ‘సుందరకాండ’ సినిమాతో ఆడియెన్స్ ముందుకొచ్చిన ఆయన.. తాజాగా మరో ఇంటరెస్టింగ్ ప్రాజెక్టును అనౌన్స్ చేశారు. రోహిత్ నారా #RN23 అనే హ్యాష్ ట్యాగ్‌తో కొత్త సినిమాను ప్రకటించారు. కరణ్ సి ప్రొడక్షన్స్ ఎల్‌ఎల్‌పీ బ్యానర్‌లో రూపొందుతున్న ఈ చిత్రంతో మరోసారి ప్రేక్షకుల ముందుకు రానున్నారు. ఈ బ్యానర్‌‌లో తెరకెక్కుతోన్న 5వ సినిమా ఇది. భరత్ చౌదరి నిర్మాతగా వ్యవహరిస్తుండగా, చినిమిల్లి మణికుమార్ దర్శకుడిగా పరిచయం అవుతున్నారు. కథ, స్క్రీన్‌ప్లేను కూడా ఆయనే అందిస్తున్నారు.
ఇది పూర్తి స్థాయి రొమాంటిక్ కామెడీ ఫ్యామిలీ ఎంటర్‌టైనర్‌గా తెరకెక్కనుంది. యూనివర్సల్ ఎమోషన్స్‌తో కూడిన కొత్త కాన్సెప్ట్‌తో ఈ చిత్రం రూపొందుతుండటంతో ఇప్పటికే సినీ వర్గాల్లో ఆసక్తి నెలకొంది. “షౌటింగ్ సూన్” (త్వరలో అరుపులు వినండి) అనే ఆసక్తికరమైన ట్యాగ్‌లైన్‌తో విడుదలైన అనౌన్స్‌మెంట్ పోస్టర్ ప్రేక్షకుల దృష్టిని ఆకర్షిస్తోంది. యూత్‌తో పాటు ఫ్యామిలీ ఆడియన్స్‌ను అలరించేలా ప్రేమ, హాస్యం, భావోద్వేగాలు, కుటుంబ అనుబంధాలను మిళితం చేసిన వినోదాత్మక కథతో సినిమా రూపొందనుంది. త్వరలోనే ముహూర్త కార్యక్రమంతో చిత్రాన్ని లాంఛనంగా ప్రారంభించనున్నారు. ఇతర నటీనటులు, సాంకేతిక నిపుణులు, రెగ్యులర్ షూటింగ్ షెడ్యూల్‌కు సంబంధించిన వివరాలను త్వరలో ప్రకటించనున్నారు.