తెలుగు సినీ పరిశ్రమలో తరాలు మారినా, ప్రతిభ మాత్రం వారసత్వంగా ముందుకు సాగుతూనే ఉంటుంది. అలాంటి ఆసక్తికరమైన పరిణామమే ఇప్పుడు ‘అగధ’ సినిమాతో మరోసారి కనిపిస్తోంది. ఒకప్పుడు స్టార్ ప్రొడ్యూసర్‌‌గా గుర్తింపు పొందిన ఎంఎస్ రాజు గతంలో వనిత విజయ్‌కుమార్‌‌ను ‘దేవి’ సినిమాతో తెలుగు ఆడియెన్స్‌కు పరిచయం చేశారు. ఇప్పుడు అదే ఎంఎస్ రాజు ఈసారి ఆయన డైరెక్షన్‌లోఆమె కుమార్తె జోవికా విజయ్‌కుమార్‌‌ను ‘అగధ’ చిత్రం ద్వారా నటిగా పరిచయం చేస్తున్నారు. ఇలా ఒకే కుటుంబానికి చెందిన రెండు తరాలను తెరపైకి తీసుకువచ్చిన దర్శకుడిగా ఆయన ప్రత్యేక గుర్తింపు సంపాదిస్తున్నారు. ఒకప్పుడు తెలుగు, తమిళ, కన్నడ భాషల్లో స్టార్‌‌గా గుర్తింపును తెచ్చుకున్న మంజుల వారసత్వాన్ని కొనసాగిస్తూ, ఇప్పుడు ఆమె మనవరాలు జోవికా తెరపైకి రావడం హాట్ టాపిక్‌గా మారింది. ‘అగధ’లో జోవికా ‘హరిణి’ అనే పాత్రలో కనిపించనుంది. తాజాగా విడుదలైన క్యారెక్టర్ పోస్టర్‌లో, వర్షంలో తడుస్తూ పురాతన నేపథ్యంలో కనిపించిన ఆమె లుక్ సినిమాపై ఆసక్తిని మరింత పెంచుతోంది. ఆమె కళ్లలో కనిపించే అమాయకత్వం, అంతర్లీనంగా దాగి ఉన్న శక్తి ఈ పాత్రలోని మర్మాన్ని సూచిస్తున్నాయి.

ఇప్పటివరకు విడుదలైన పోస్టర్లు చూసినా, ‘అగధ’ ఒక ఆధ్యాత్మికత, మిస్టరీ, ఇంటెన్సిటీ కలగలిసిన కథగా ఉండబోతోందని అర్థమవుతోంది. భారీ సెట్స్, 85 రోజుల షూటింగ్, దాదాపు 45 నిమిషాల విఎఫ్ఎక్స్ ఈ సినిమా ప్రత్యేకమైన విజువల్ అనుభూతిని అందించబోతుందని యూనిట్ నమ్మకంగా చెబుతోంది. ఎంఎస్ రాజు రచన, దర్శకత్వంలో రూపొందుతున్న ఈ చిత్రాన్ని కాశీ విశాలాక్షి బలుసు నిర్మిస్తున్నారు. తెలుగు తో పాటు తమిళ, కన్నడ, మలయాళ, హిందీ భాషల్లో ఏకకాలంలో రూపొందుతున్న ఈ చిత్రం ప్రస్తుతం పోస్ట్ ప్రొడక్షన్ దశలో ఉంది.