Producer Venu Donepudi Interview Upcoming Projects

సినిమా నిర్మాణంలో విజయం సాధించాలంటే కథతో పాటు సరైన ప్రణాళిక, బడ్జెట్‌పై నియంత్రణ కూడా ఎంతో ముఖ్యం. కొత్త తరహా కథలను ఎంచుకుంటూ, విభిన్నమైన లొకేషన్లలో సినిమాలను రూపొందించేందుకు ఆసక్తి చూపిస్తున్న నిర్మాత వేణు దోనేపూడి ప్రస్తుతం తన తదుపరి ప్రాజెక్టులపై దృష్టి సారిస్తున్నారు. చిత్రాలయం స్టూడియోస్‌పై ఆయన నిర్మించిన క్రైమ్ కామెడీ ‘బా బా బ్లాక్ షీప్’కు ప్రేక్షకుల నుంచి మంచి స్పందన రావడంతో ఆయన మరింత ఉత్సాహంగా ఉన్నారు. అక్టోబర్ 9న విడుదలైన ఈ చిత్రం బాక్సాఫీస్ వద్ద బ్రేక్ ఈవెన్ సాధించిందని వెల్లడించిన వేణు.. తన సినీ ప్రయాణం, ‘విశ్వం’ సమయంలో ఎదురైన అనుభవాలు, మేఘాలయలో షూటింగ్ విశేషాలు, రాబోయే చిత్రాల గురించి ఆసక్తికర విషయాలు పంచుకున్నారు.

వేణు దోనేపూడి కుటుంబానికి సినిమా రంగంతో మొదటి నుంచీ అనుబంధం ఉంది. ఆయన తాత థియేటర్ నిర్వహించగా, కుటుంబంలోనూ సినిమాలపై ఆసక్తి ఉండేది. 1990వ దశకంలో అమెరికాలో ఆటోమొబైల్ వ్యాపారం చేసిన ఆయన.. అక్కడే డిస్ట్రిబ్యూషన్, ఎగ్జిబిషన్ రంగాల్లోనూ పనిచేశారు. అమెరికా, యూకే, ఆస్ట్రేలియా, సింగపూర్ సహా పలు దేశాల్లో సినిమాలను పంపిణీ చేసిన అనుభవం ఆయనకు ఉంది.

2008లో భారత్‌కు తిరిగొచ్చిన తర్వాత సినీ నిర్మాణం వైపు అడుగులు వేశారు. అక్కినేని నాగేశ్వరరావు సూచనతో అన్నపూర్ణ బ్యానర్ ద్వారా ఇండస్ట్రీలోకి రావాలనుకున్నారు. ఆ క్రమంలో ‘మనం’ చిత్రంలోనూ కనిపించారు. తన తాతగారి కలను నిజం చేయాలనే ఉద్దేశంతో రచనపై కూడా దృష్టి సారించినట్లు వేణు తెలిపారు.

సినిమా నిర్మాణంలో ఎదురైన అనుభవాల గురించి మాట్లాడుతూ ‘విశ్వం’ సమయంలో తాను కొన్ని కీలక పాఠాలు నేర్చుకున్నట్లు వేణు వెల్లడించారు. గోపీ మోహన్, శ్రీను వైట్లతో పరిచయం ఏర్పడిన తర్వాత ఈ సినిమా ప్రయాణం మొదలైందని చెప్పారు. అయితే, సహ నిర్మాతలుగా వచ్చిన కొందరు అసలు నిర్మాతల్లా వ్యవహరించడంతో సమస్యలు తలెత్తాయని వివరించారు.

షూటింగ్ పూర్తికాకముందే అన్ని రకాల బిజినెస్‌లు పూర్తయినా, ఆ తర్వాత వివాదాలు ఎదురయ్యాయని తెలిపారు. ఈ వ్యవహారంలో న్యాయపరమైన చర్యలు తీసుకున్నామని, చట్టపరమైన ప్రక్రియ కొనసాగుతోందని పేర్కొన్నారు. ఇండస్ట్రీలోకి రావద్దని కుటుంబ సభ్యులు తొలుత సూచించినప్పటికీ, సినిమాల ద్వారా కూడా గౌరవాన్ని సంపాదించవచ్చనే నమ్మకంతో ఈ రంగంలోకి వచ్చినట్లు చెప్పారు.

‘బా బా బ్లాక్ షీప్’ ఆలోచన వెనుక కొత్త తరానికి తగ్గ కథను అందించాలనే లక్ష్యం ఉందని వేణు తెలిపారు. ‘విశ్వం’ తర్వాత ‘రామం’ ప్రాజెక్టును ప్రారంభించిన సమయంలో దర్శకుడు గుణి మంచికంటితో పరిచయం ఏర్పడిందని చెప్పారు. జెన్ జీ ప్రేక్షకులకు నచ్చే కథను తెరకెక్కించాలనే ఆలోచనకు దర్శకుడు చెప్పిన కథ సరిపోయిందని వివరించారు. ఈ సినిమాను 42 రోజుల్లో పూర్తి చేస్తానని దర్శకుడు చెప్పగా, తాను మాత్రం 30 రోజుల్లోనే షూటింగ్ ముగించవచ్చని భావించినట్లు తెలిపారు. అనుకున్నదానికంటే ముందుగానే కేవలం 28 రోజుల్లో చిత్రీకరణ పూర్తి చేయగలిగామని వెల్లడించారు. సరైన ప్రణాళికతో తక్కువ సమయంలోనూ సినిమాను పూర్తి చేయవచ్చని ఈ అనుభవం నిరూపించిందని ఆయన అభిప్రాయపడ్డారు.

‘బా బా బ్లాక్ షీప్’కు మేఘాలయ నేపథ్యాన్ని ఎంచుకోవడం వెనుక తన ప్రయాణాల అనుభవం ఉందని వేణు చెప్పారు. కథ విన్న వెంటనే ఈశాన్య భారతదేశంలో చిత్రీకరిస్తే కొత్తదనం ఉంటుందని భావించినట్లు వివరించారు. అక్కడి ప్రభుత్వాన్ని సంప్రదించిన తర్వాత అనుమతులు త్వరగా లభించాయని, బృందాన్ని పంపించి రెక్కీ నిర్వహించామని తెలిపారు. మేఘాలయ ముఖ్యమంత్రి కాన్రాడ్ సంగ్మాతోనూ మాట్లాడినట్లు వెల్లడించిన వేణు.. అక్కడ సినిమా షూటింగ్‌లకు సంబంధించి ప్రత్యేక విధానం రూపొందించే ప్రక్రియలో తాను కూడా భాగస్వామినయ్యానని చెప్పారు. ప్రకృతి అందాల పరంగా మేఘాలయ స్విట్జర్లాండ్‌కు ఏమాత్రం తీసిపోదని ప్రశంసించారు.

అయితే, అక్కడ షూటింగ్ చేయడం అంత సులభం కాలేదని కూడా తెలిపారు. ముఖ్యంగా ఆహారం విషయంలో ప్రారంభంలో ఇబ్బందులు ఎదురయ్యాయని చెప్పారు. తెలుగు బృందానికి అలవాటైన ఆహార పదార్థాలు స్థానికంగా అందుబాటులో లేకపోవడంతో పాలు, పెరుగు, చేపలు వంటి వాటిని ఇతర ప్రాంతాల నుంచి తెప్పించాల్సి వచ్చిందని వివరించారు. మొదటి వారం ఇబ్బందులు ఎదురైనా, తర్వాత వాటిని అధిగమించామని తెలిపారు. తమ అనుభవం కారణంగా ఆ తర్వాత అక్కడ షూటింగ్ చేసే బృందాలకు అవసరమైన సదుపాయాల కల్పన మరింత సులభమైందని పేర్కొన్నారు.

‘బా బా బ్లాక్ షీప్’ ఫలితం పట్ల సంతోషంగా ఉన్నామని వేణు దోనేపూడి తెలిపారు. రెండు తెలుగు రాష్ట్రాల్లో 150కి పైగా థియేటర్లలో, ఉత్తర భారతదేశంలో సుమారు 100 థియేటర్లలో సినిమాను విడుదల చేశామని చెప్పారు. ఓవర్సీస్‌లోనూ ప్రేక్షకుల ముందుకు తీసుకొచ్చామని, అన్ని ప్రాంతాల్లోనూ మంచి స్పందన లభించిందని వెల్లడించారు.

తమ సినిమా అన్ని చోట్లా బ్రేక్ ఈవెన్ సాధించిందని, ఓటీటీ ఒప్పందం కూడా పూర్తయిందని తెలిపారు. నవంబర్ 6 నుంచి అమెజాన్‌లో స్ట్రీమింగ్ కానుందని పేర్కొన్నారు. సినిమా నిర్మాణ సమయంలో టీమ్‌కు 30 రోజుల పాటు జీతాలు చెల్లించామని, యూనియన్ నిర్దేశించిన లెక్కల కంటే ఎక్కువ పారితోషికం ఇచ్చామని వెల్లడించారు.

తన తదుపరి చిత్రాల గురించి వేణు మాట్లాడుతూ ‘రామం’ తన కలల ప్రాజెక్ట్ అని తెలిపారు. వీఎన్ ఆదిత్య అందించిన మూల కథతో ఈ సినిమాను భారీ స్థాయిలో నిర్మిస్తున్నామని చెప్పారు. భారీ బడ్జెట్‌తో రూపొందించే చిత్రాన్ని కూడా సరైన ప్రణాళికతో నియంత్రిత వ్యయంతో తెరకెక్కించవచ్చని ‘రామం’ ద్వారా నిరూపించాలనుకుంటున్నట్లు పేర్కొన్నారు.

ఇక ‘గాంధీతాతచెట్టు’ చిత్ర దర్శకురాలితో ఓ ప్రేమకథను రూపొందిస్తున్నట్లు వెల్లడించారు. వీటితో పాటు ఇద్దరు ప్రముఖ హీరోలతో మరో రెండు సినిమాలు చేస్తున్నామని, వాటికి సంబంధించిన అధికారిక ప్రకటనలు త్వరలో వెలువడతాయని చెప్పారు.