Allu Arjun–Lokesh Kanagaraj’s AA23: Big Updates Soon
ఐకాన్ స్టార్ అల్లు అర్జున్, సెన్సేషనల్ డైరెక్టర్ లోకేష్ కనగరాజ్ కాంబినేషన్‌లో తెరకెక్కనున్న క్రేజీ ప్రాజెక్ట్ ‘AA23’ మరోసారి హాట్ టాపిక్‌గా మారింది. ఈ సినిమా ఆగిపోయిందంటూ గత కొద్ది రోజులుగా సోషల్ మీడియాలో వినిపిస్తున్న ప్రచారానికి దర్శకుడు లోకేష్ కనగరాజ్ తనదైన స్టైల్‌లో చెక్ పెట్టారు. అల్లు అర్జున్‌తో కలిసి దిగిన ఓ ఫొటోను షేర్ చేస్తూ.. త్వరలోనే ఆసక్తికరమైన అప్‌డేట్స్ రాబోతున్నాయంటూ ఇచ్చిన హింట్ ఇప్పుడు అభిమానుల్లో కొత్త ఉత్సాహాన్ని నింపుతోంది.
Allu Arjun–Lokesh Kanagaraj’s AA23: Big Updates Soon
అల్లు అర్జున్, లోకేష్ కనగరాజ్ కలయికలో సినిమా అనౌన్స్ అయినప్పటి నుంచే ఈ ప్రాజెక్ట్‌పై భారీ అంచనాలు నెలకొన్నాయి. అయితే, సినిమా ప్రీ ప్రొడక్షన్ పనులు జరుగుతున్న నేపథ్యంలో క్రియేటివ్ డిఫరెన్సెస్ కారణంగా ప్రాజెక్ట్ నిలిచిపోయిందనే వార్తలు చక్కర్లు కొట్టాయి. ఈ ప్రచారంపై చిత్రబృందం నుంచి అధికారిక ప్రకటన రాకపోవడంతో అభిమానుల్లోనూ కొంత సందిగ్ధత నెలకొంది. ఇలాంటి సమయంలో బన్నీతో కలిసి ఉన్న ఫొటోను లోకేష్ కనగరాజ్ సోషల్ మీడియాలో పోస్ట్ చేయడం, త్వరలో ఆసక్తికరమైన అప్‌డేట్స్ ఉంటాయని చెప్పడంతో ఈ ప్రాజెక్ట్‌పై చర్చ మళ్లీ ఊపందుకుంది.
షేర్ చేసిన ఫొటోలో అల్లు అర్జున్‌తో లోకేష్ కనగరాజ్ సీరియస్‌గా ఏదో చర్చిస్తున్నట్లు కనిపిస్తున్నారు. దీంతో సినిమా ప్రీ ప్రొడక్షన్ పనులు, కథా చర్చలు, తదుపరి షెడ్యూల్స్‌పై అభిమానుల్లో ఆసక్తి పెరిగింది. అయితే, ఈ ఫొటోలోని చర్చకు సంబంధించిన వివరాలను చిత్రబృందం వెల్లడించలేదు. త్వరలోనే రాబోయే అప్‌డేట్స్‌లో ఈ ప్రాజెక్ట్‌కు సంబంధించి కీలక విషయాలు బయటకు వచ్చే అవకాశం ఉందని అభిమానులు ఆశిస్తున్నారు.
అల్లు అర్జున్ కెరీర్‌లో 23వ చిత్రంగా రూపొందనున్న ‘AA23’ను మైత్రీ మూవీ మేకర్స్ భారీ స్థాయిలో నిర్మించనుంది. ఈ ప్రాజెక్ట్‌లో రాక్‌స్టార్ అనిరుధ్ రవిచందర్ సంగీతం అందిస్తుండటం మరో ప్రత్యేక ఆకర్షణ. ఇప్పటికే విడుదలైన అనౌన్స్‌మెంట్ వీడియో, సాంగ్ ప్రేక్షకుల్లో మంచి ఆసక్తిని రేకెత్తించాయి. అనిరుధ్ మ్యూజిక్, లోకేష్ మార్క్ మేకింగ్, బన్నీ స్క్రీన్ ప్రెజెన్స్ కలిస్తే ఈ సినిమా ఎలాంటి సంచలనం సృష్టిస్తుందనే చర్చ మొదలైంది.
ఈ చిత్ర నిర్మాణంలో బన్నీ వాస్, సందీప్ రామినేని, నటరాజ్, స్వాతి సహ నిర్మాతలుగా భాగమయ్యారు. భారీ అంచనాల మధ్య తెరకెక్కనున్న ఈ ప్రాజెక్ట్‌కు సంబంధించి ప్రస్తుతం ప్రీ ప్రొడక్షన్ పనులు జరుగుతున్నాయి. డిసెంబర్ నుంచి షూటింగ్ ప్రారంభమయ్యే అవకాశాలున్నాయనే ప్రచారం వినిపిస్తున్నప్పటికీ, దీనిపై అధికారిక ప్రకటన రావాల్సి ఉంది.
‘AA23’ కథాంశం గురించి ఇప్పటివరకు పూర్తి వివరాలు బయటకు రాలేదు. అయితే, ఈ సినిమా పోలీస్ ఆఫీసర్ నేపథ్యంలో సాగుతుందనే ప్రచారం సినీ వర్గాల్లో వినిపిస్తోంది. ఈ వార్త నిజమైతే అల్లు అర్జున్‌ను లోకేష్ కనగరాజ్ ఎలా చూపించబోతున్నారనేది ఆసక్తికరంగా మారుతుంది. తన సినిమాల్లో బలమైన పాత్రలు, ఇంటెన్స్ యాక్షన్, గ్రిప్పింగ్ స్క్రీన్‌ప్లేతో ప్రత్యేక గుర్తింపు తెచ్చుకున్న లోకేష్.. బన్నీ కోసం ఎలాంటి ప్రపంచాన్ని సృష్టించారో చూడాలని అభిమానులు ఎదురుచూస్తున్నారు.
ఇక ప్రస్తుతం అల్లు అర్జున్, దర్శకుడు అట్లీ తెరకెక్కిస్తున్న ‘రాకా’ చిత్రంతో బిజీగా ఉన్నారు. సైన్స్ ఫిక్షన్ థ్రిల్లర్‌గా రూపొందుతున్న ఈ సినిమా షూటింగ్ వేగంగా సాగుతోంది. ఒకవైపు ‘రాకా’తో ప్రేక్షకులను మరో కొత్త ప్రపంచంలోకి తీసుకెళ్లేందుకు సిద్ధమవుతున్న బన్నీ.. మరోవైపు లోకేష్ కనగరాజ్‌తో కలిసి చేయనున్న ‘AA23’తో ఎలాంటి సంచలనం సృష్టిస్తారోననే ఆసక్తి నెలకొంది.
About the Author
