Vaishnavi Chaitanya Opens Up on Epic First Semester
‘బేబీ’తో ప్రేక్షకుల హృదయాలను గెలుచుకున్న ఆనంద్ దేవరకొండ–వైష్ణవి చైతన్య జోడీ మరోసారి కలిసి నటిస్తున్న చిత్రం ‘ఎపిక్ – ఫస్ట్ సెమిస్టర్’. ‘90s’ వెబ్ సిరీస్‌తో ప్రేక్షకులకు దగ్గరైన యువ దర్శకుడు ఆదిత్య హాసన్ ఈ సినిమాతో దర్శకుడిగా వెండితెరపై అడుగుపెడుతున్నారు. శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య నిర్మిస్తున్న ఈ చిత్రం సెప్టెంబర్ 11న ప్రేక్షకుల ముందుకు రానుంది. సినిమా విడుదలకు సమయం దగ్గరపడుతున్న నేపథ్యంలో హీరోయిన్ వైష్ణవి చైతన్య మీడియాతో ముచ్చటిస్తూ ‘ఎపిక్’లోని తన పాత్రతో పాటు కెరీర్, ఆనంద్ దేవరకొండతో మరోసారి కలిసి పనిచేయడం, దర్శకుడు ఆదిత్య హాసన్ ప్రత్యేకత వంటి ఎన్నో విషయాలను పంచుకున్నారు.
Vaishnavi Chaitanya Opens Up on Epic First Semester
‘కడలి’ కేవలం పాత్ర కాదు.. ప్రతి ఒక్కరిలో ఉండే భావన
‘ఎపిక్’లో వైష్ణవి పోషించిన పాత్ర పేరు కడలి. తన కోసం తాను నిలబడే, జీవితంపై స్పష్టత ఉన్న స్ట్రాంగ్ యువతి పాత్రలో ఆమె కనిపించనున్నారు. అయితే కడలి పాత్ర గురించి వైష్ణవి చెప్పిన మాటలు ఆసక్తికరంగా ఉన్నాయి. ప్రతి ఒక్కరి మనసులోనూ కడలి లాంటి వ్యక్తిత్వం ఉంటుందని, కానీ కుటుంబం లేదా సమాజం కారణంగా చాలామంది తమ నిజమైన భావాలను బయటపెట్టలేకపోతారని ఆమె అభిప్రాయపడ్డారు. జీవితంలో ఏదో ఒక సందర్భంలో మన కోసం మనమే నిలబడాల్సిన అవసరం ఉంటుందని చెప్పిన వైష్ణవి, అందుకే కడలి పాత్ర తనకు ఎంతో దగ్గరైందని తెలిపారు.
‘బేబీ’ గుర్తుకు రాకపోతేనే మా విజయం
‘బేబీ’ బ్లాక్‌బస్టర్ తర్వాత అదే జోడీగా ఆనంద్ దేవరకొండ, వైష్ణవి చైతన్య మరోసారి తెరపై కనిపిస్తుండటంతో సహజంగానే అంచనాలు ఏర్పడ్డాయి. అయితే రెండు సినిమాలను పోల్చడం సరైంది కాదని వైష్ణవి అంటున్నారు. ‘బేబీ’, ‘ఎపిక్’ రెండూ పూర్తిగా భిన్నమైన కథలని చెబుతూ.. ఈసారి ప్రేక్షకులు తమను చూస్తున్నప్పుడు ‘బేబీ’ పాత్రలు గుర్తుకు రాకుండా కొత్తగా కనిపించగలిగితే అదే తమ విజయమని ఆమె పేర్కొన్నారు. ఒత్తిడి కంటే ఈ సినిమాను ఒక ఛాలెంజ్‌గా తీసుకొని పనిచేశామని చెప్పారు.
ప్రేమకథే.. కానీ కొత్త కోణంలో
‘ఎపిక్ – ఫస్ట్ సెమిస్టర్’ ఒక ప్రేమకథ అయినప్పటికీ, సాధారణంగా చూసే లవ్ స్టోరీలకు భిన్నంగా ఉంటుందని వైష్ణవి వెల్లడించారు. భిన్నమైన ఆలోచనలు, భిన్నమైన వ్యక్తిత్వాలు కలిగిన ఇద్దరు వ్యక్తులు చదువు కోసం యూకేకు వెళ్లి అక్కడ పరిచయం కావడం.. అనంతరం వారి మధ్య ఏర్పడే అనుబంధం చుట్టూ కథ సాగుతుందని తెలిపారు. ముఖ్యంగా ఇద్దరు వ్యక్తులు తమ వ్యక్తిగత జీవితంలో పంచుకునే సంభాషణలు, ప్రేమపై వారి అభిప్రాయాలు, జీవితాన్ని చూసే విధానం సినిమాలో ప్రధాన ఆకర్షణగా నిలుస్తాయని చెప్పారు. భారీ హంగామా కంటే ప్రేక్షకుల మనసును హత్తుకునే భావోద్వేగాలే ‘ఎపిక్’ బలమని ఆమె అభిప్రాయపడ్డారు.
కడలి నేర్పిన కాన్ఫిడెన్స్
సినిమా ద్వారా ఒక నటుడు పాత్రకు జీవం పోయడమే కాదు.. కొన్ని పాత్రలు నటుడి వ్యక్తిత్వంపైనా ప్రభావం చూపుతాయి. వైష్ణవి విషయంలో కడలి పాత్ర అలాంటి మార్పునే తీసుకొచ్చిందట. బయట ఏదైనా విషయం మాట్లాడేటప్పుడు తాను కొంత సంకోచానికి గురవుతానని చెప్పిన వైష్ణవి, కడలి పాత్ర మాత్రం ముందు మనల్ని మనం నమ్ముకోవాలని, ధైర్యంగా ఉండాలని నేర్పిందని తెలిపారు. ఒక సమస్యను ఎదుర్కొంటూ తన జీవితాన్ని ముందుకు తీసుకెళ్లే యువతి ప్రయాణమే ఈ పాత్రలో ప్రధాన అంశమని చెప్పారు.
ఆదిత్య హాసన్.. జీవితాన్ని గమనించే దర్శకుడు
‘90s’ వెబ్ సిరీస్ చూసినప్పుడే దర్శకుడు ఆదిత్య హాసన్ పనితనం తనకు నచ్చిందని వైష్ణవి తెలిపారు. ‘ఎపిక్’ కథ చెప్పే సమయంలోనే ఆయనతో తనకు తొలిసారి పరిచయం ఏర్పడిందని చెప్పారు. ఆదిత్య హాసన్ జీవితంలోని చిన్న చిన్న విషయాలను కూడా ఎంతో లోతుగా గమనిస్తారని, వాటి ప్రాధాన్యతను అర్థం చేసుకొని కథలో భాగం చేస్తారని ఆమె ప్రశంసించారు. ‘ఎపిక్’లో కూడా పాత్రల మధ్య జరిగే చిన్న సంఘటనలు, సంభాషణలకు ప్రత్యేకమైన ప్రాధాన్యత ఉంటుందని చెప్పారు. తనకు ఇష్టమైన దర్శకుల్లో ఆదిత్య కూడా ఒకరని వైష్ణవి పేర్కొన్నారు.
‘అల వైకుంఠపురములో’ నుంచి హీరోయిన్‌గా..
సితార ఎంటర్‌టైన్‌మెంట్స్ బ్యానర్‌తో వైష్ణవికి ప్రత్యేకమైన అనుబంధం ఉంది. గతంలో ‘అల వైకుంఠపురములో’ చిత్రంలో చిన్న పాత్ర చేసిన ఆమె.. ఇప్పుడు అదే నిర్మాణ సంస్థలో హీరోయిన్‌గా నటించడం తనకు ఎంతో ఆనందంగా ఉందని చెప్పారు. జీవితంలో పెద్ద కలలు కనొచ్చని, వాటిని నిజం చేసుకునే అవకాశం కూడా ఉంటుందని తన ప్రయాణం తనకే నేర్పిందని వైష్ణవి భావోద్వేగంగా తెలిపారు. షార్ట్ ఫిలిమ్స్ నుంచి సినీ పరిశ్రమలోకి అడుగుపెట్టి.. ఇప్పుడు స్టార్ హీరోయిన్‌గా ఎదుగుతున్న ప్రయాణం తనకు మాటల్లో చెప్పలేని ఆనందాన్ని ఇస్తోందన్నారు.
నాగవంశీ గురించి ఏమన్నారు?
సితార ఎంటర్‌టైన్‌మెంట్స్‌లో పనిచేయడం చాలా ఆనందంగా ఉందని వైష్ణవి చెప్పారు. నిర్మాత నాగవంశీ సినిమా విషయంలో నటీనటులు, దర్శకులకు పూర్తి స్వేచ్ఛ ఇస్తారని తెలిపారు. ఖర్చు విషయంలో రాజీపడకుండా, తెరపై సినిమా అవుట్‌పుట్ అత్యుత్తమంగా రావాలనే లక్ష్యంతో పనిచేస్తారని ఆమె ప్రశంసించారు.
ఫ్యామిలీ ఆడియన్స్ ‘ఎపిక్’ చూడొచ్చా?
సినిమాలో లివ్-ఇన్ రిలేషన్‌షిప్ నేపథ్యం ఉన్నప్పటికీ, ఫ్యామిలీ ప్రేక్షకులు ఎలాంటి సంకోచం లేకుండా సినిమా చూడవచ్చని వైష్ణవి స్పష్టం చేశారు. ‘90s’ వెబ్ సిరీస్‌లా పూర్తిగా క్లీన్ ఎంటర్‌టైనర్ కాకపోయినా.. కథకు ఎంత అవసరమో అంతే చూపిస్తూ దర్శకుడు ఆదిత్య హాసన్ ఫ్యామిలీ ఆడియన్స్‌ను కూడా దృష్టిలో పెట్టుకున్నారని చెప్పారు. ఇబ్బందికరమైన సన్నివేశాలు ఉండవని, యువతతో పాటు కుటుంబ ప్రేక్షకులు కూడా ఈ కథకు కనెక్ట్ అవుతారని వైష్ణవి నమ్మకం వ్యక్తం చేశారు.
వరుస ప్రాజెక్టులతో బిజీ
‘ఎపిక్ – ఫస్ట్ సెమిస్టర్’ తర్వాత కూడా వైష్ణవి చైతన్య చేతిలో ఆసక్తికరమైన ప్రాజెక్టులు ఉన్నాయి. సితార ఎంటర్‌టైన్‌మెంట్స్‌లో నితిన్‌తో ఒక సినిమా చేస్తుండగా, తమిళంలో రెండు చిత్రాలు, హిందీలో ఒక ప్రాజెక్ట్ చేస్తున్నట్లు వెల్లడించారు.
About the Author
