ఏడాదికో సామాజిక కార్యక్రమం చేయమంటూ తన అభిమానులకు ఐకాన్ స్టార్ అల్లు అర్జున్ మార్గనిర్దేశం చేసిన నేపథ్యంలో ఫ్యాన్స్ ఈ ఏడాది హెచ్ పీవీ వ్యాక్సిన్ అవగాహన కార్యక్రమం చేపట్టారు. ఈ కార్యక్రమాన్ని విజయవంతంగా చేస్తున్న సందర్భంగా తన అభిమానులను ప్రశంసిస్తూ సోషల్ మీడియా పోస్ట్ చేశారు అల్లు అర్జున్. తను చెప్పినట్లు ఈ ఏడాది ఒక మంచి సామాజిక కార్యక్రమం చేస్తున్న అభిమానులను చూస్తుంటే గర్వంగా ఉందని ఆయన తన పోస్ట్ లో పేర్కొన్నారు.
యువతులు, మహిళలు హెచ్ పీవీ వ్యాక్సిన్ తీసుకోవాల్సిన అవసరాన్ని తెలియజేస్తూ అల్లు అర్జున్ ఫ్యాన్స్ అసోసియేషన్ అవగాహన కార్యక్రమాలు చేస్తోంది. ఈ కార్యక్రమానికి మంచి రెస్పాన్స్ వస్తోంది. అభిమానులు చేపట్టిన ఈ సేవా కార్యక్రమం తన అంచనాలు మించిందని అల్లు అర్జున్ సంతోషాన్ని వ్యక్తం చేశారు. తన అభిమానులు చేస్తున్న ఈ మంచి కార్యక్రమానికి సపోర్ట్ గా నిలుస్తున్న మంత్రులు, రాజకీయ నేతలు, అధికారులకు అల్లు అర్జున్ కృతజ్ఞతలు తెలిపారు. సమాజ హితం కోసం చేసే ఇలాంటి కార్యక్రమాలకు ప్రతి ఒక్కరూ తమ సహకారం అందించాలని అల్లు అర్జున్ కోరారు. అల్లు అర్జున్ చేసిన ఈ సోషల్ మీడియా పోస్ట్ కు అత్యధికంగా నెటిజన్స్ స్పందిస్తున్నారు. అల్లు అర్జున్ ఫ్యాన్స్ అసోసియేషన్ సభ్యులకు ప్రశంసలు అందిస్తున్నారు.