Sharwanand Srinu Vaitla Combo Begins In August

హీరో శర్వానంద్, దర్శకుడు శ్రీను వైట్ల కలిసి ఓ కొత్త ఫ్యామిలీ ఎంటర్‌టైనర్‌తో ప్రేక్షకుల ముందుకు రానున్నారు. ఈ చిత్రాన్ని ఏకే ఎంటర్‌‌టైన్‌మెంట్స్ బ్యానర్‌పై నిర్మాత అనిల్ సుంకర నిర్మిస్తున్నారు. ఇప్పటికే ప్రీ-ప్రొడక్షన్ పనులు వేగంగా కొనసాగుతుండగా, సినిమాపై ఇండస్ట్రీలో మంచి ఆసక్తి నెలకొంది. ప్రస్తుతం ఈ చిత్రానికి ‘జార్జ్ క్రిష్’ అనే టైటిల్‌ను పరిశీలిస్తున్నట్లు సమాచారం. అయితే దీనిపై మేకర్స్ నుంచి అధికారిక ప్రకటన రావాల్సి ఉంది. కథకు, హీరో పాత్రకు తగ్గట్టుగా ఈ టైటిల్‌ను ఎంపిక చేసే ఆలోచనలో చిత్రబృందం ఉన్నట్లు టాక్ వినిపిస్తోంది.

ఈ సినిమాను వచ్చే నెలలో పూజా కార్యక్రమాలతో అధికారికంగా ప్రారంభించేందుకు సన్నాహాలు జరుగుతున్నాయి. అనంతరం ఆగస్టు నుంచి రెగ్యులర్ షూటింగ్ ప్రారంభించనున్నట్లు తెలుస్తోంది. ఇప్పటికే ప్రధాన నటీనటులు, సాంకేతిక నిపుణుల ఎంపిక దాదాపు పూర్తయిందని, త్వరలోనే పూర్తి వివరాలను ప్రకటించే అవకాశం ఉందని సినీ వర్గాలు చెబుతున్నాయి.

ఇటీవలి కాలంలో సరైన కమర్షియల్ హిట్ కోసం ఎదురుచూస్తున్న శ్రీను వైట్ల ఈ సినిమాను ఎంతో ప్రతిష్ఠాత్మకంగా తెరకెక్కిస్తున్నారని సమాచారం. తనకు ప్రత్యేక గుర్తింపు తీసుకొచ్చిన కామెడీ, ఫ్యామిలీ ఎమోషన్స్, యాక్షన్, వినోదం కలగలిపిన స్టైల్‌లో ఈ చిత్రాన్ని రూపొందించే ప్రయత్నంలో ఉన్నట్లు తెలుస్తోంది. శర్వానంద్ ఇమేజ్‌కు తగ్గట్టుగా పూర్తి స్థాయి ఫ్యామిలీ ఎంటర్‌టైనర్‌గా స్క్రిప్ట్ సిద్ధమైందని టాక్. ఈ చిత్రాన్ని వచ్చే ఏడాది సంక్రాంతి కానుకగా ప్రేక్షకుల ముందుకు తీసుకురావాలన్న లక్ష్యంతో మేకర్స్ షెడ్యూల్స్ ప్లాన్ చేస్తున్నారు. షూటింగ్, పోస్ట్ ప్రొడక్షన్ పనులను ఎలాంటి ఆలస్యం లేకుండా పూర్తి చేసి పండుగ సీజన్‌ను క్యాష్ చేసుకోవాలని భావిస్తున్నారు.

సంక్రాంతి సీజన్ శర్వానంద్‌కు మంచి విజయాలను అందించిన సందర్భాలు ఎన్నో ఉన్నాయి. ఆయన నటించిన ఎక్స్‌ప్రెస్ రాజా, శతమానం భవతి, నారీ నారీ నడుమ మురారి వంటి చిత్రాలు పండుగ సమయంలో విడుదలై ప్రేక్షకుల ఆదరణ పొందాయి. ముఖ్యంగా ఫ్యామిలీ ఆడియన్స్‌ను ఆకట్టుకోవడంలో శర్వానంద్‌కు ప్రత్యేక గుర్తింపు ఉంది. అందుకే మరోసారి అదే సీజన్‌లో పూర్తి స్థాయి ఫ్యామిలీ ఎంటర్‌టైనర్‌తో ప్రేక్షకులను అలరించాలని ఆయన నిర్ణయించుకున్నట్లు తెలుస్తోంది.

ఇక శర్వానంద్ ప్రస్తుతం దర్శకుడు సంపత్ నంది తెరకెక్కిస్తున్న ‘భోగి’ చిత్రంలో నటిస్తున్నాడు. పీరియాడిక్ యాక్షన్ డ్రామాగా రూపొందుతున్న ఈ సినిమా షూటింగ్ చివరి దశకు చేరుకుంది. ఈ ప్రాజెక్ట్ పూర్తయ్యిన వెంటనే శ్రీను వైట్ల సినిమా సెట్స్‌లోకి వెళ్లనున్నట్లు సమాచారం.